Прашањето за почеток на преговори на Северна Македонија со Брисел е неопходен одговор на потребата за безбедност на Европа, констатирале на денешната средба премиерот Димитар Ковачевски и претседателот на Комисијата за надворешни работи на Домот на пратениците на италијанскиот парламент, Пјеро Фасино.
Како што информираа од Владата, средбата се одржала пред почетокот на официјалната и работна посета на Италија и Ватикан. На неа било истакнато традиционалното пријателство меѓу Северна Македонија и Италија за кое било речено дека постојано се унапредува на највисоко институционално ниво и се темели на заедничките европски вредности.
„Премиерот Ковачевски на средбата се заблагодари за силната поддршка за европските перспективи на нашата земја која беше и формално изразена со резолуцијата на Парламентот на Република Италија во која италијанските народни претставници побараа ЕУ да го продолжи проширувањето со итно започнување преговори за членство со Северна Македонија и Албанија, како приоритетно прашање со која ќе биде потврдена европската перспектива на Западен Балкан“,
наведуваат од владината прес-служба.
Ковачевски во тек на престојот во Ватикан и Рим ќе има аудиенција кај папата Франциск и ќе присуствува на молебенот на гробот на Св. Кирил во црквата „Сан Клементе“, а во работниот дел од посетата се најавени средби со претседателот на Советот на министри на Италија Марио Драги, како и со премиерот на Бугарија, Кирил Петков.