Србија побара официјален одговор од грчките власти за проблемот со преминување на нивната граница од страна на српски државјани и чека одговор. Според српски официјални лица, очигледно постојат несогласувања во грчките институции.
Министерот за трговија, туризам и телекомуникации Расим Љајиќ изјави дека барањњето е испратено преку српската амбасада.
„Прашуваме, дали таа одлука важи и за државјаните на Србија, бидејќи пред само два дена, министерот за надворешни работи на Грција му вети на Дачиќ дека границите ќе бидат отворени на 15 јуни“,
кажа Љајиќ и додаде дека колони чекаа на влезот во Грција.
Тој исто така изјави дека пред тоа, на 19 мај, грчкиот премиер Киријакос Мицотакис истото му го ветил на претседателот на Србија, Александар Вучиќ и дека сега Србија чека одговор и појаснување.
„Што се случи, буквално за два дена, да се донесе една ваква одлука“, праша Љајиќ.
Од српската царинска управа велат дека патниците на граничниот премин Прешево, на границата со Северна Македонија, се враќаат во Србија и дека станува збор за индивидуални поаѓања, што не се организирани од туристичките агенции.
Од Бугарија во Грција можат да влезат само државјани на ЕУ, а границата меѓу двете држави се отвори точно во 11 часот, соопшти денеска Бугарската гранична полиција.
Реакцијата на српските власти следува откако денеска колони возила биле вратени од македонско-грчката граница со образложение дека грчката копнена граница останува затворена за сообраќај до 30 јуни.