Народната банка на Србија (НБС) ја отфрли можноста за договор со Централната банка на Косово (ЦБК) и наведува дека единствената можна опција е да се инсистира на политички формат на разговорите во рамките на дијалогот на постојно ниво
Од Централната банка на Косово изјавиле дека Народната банка на Србија не контактирала со нив и дека не добиле никакви барања, како и дека јавно изразиле подготвеност да се вклучат во дискусии со цел да се олесни процесот на префрлање средства на банкарските сметки на корисниците во евра врз основа на постоечките регионални практики
Српските динари се уште се во оптек во Косово на 1 февруари. На првиот ден од стапувањето во сила на одлуката за укинување на динарите, тие ќе може да се тргуваат во продавници, да се исплаќаат во пошти и да се подигнат од банкоматите, информира регионалниот сервис на Радио Слободна Европа (РСЕ).
Регулативата на Централната банка на Косово (ЦБК) предвидува за плаќање да се користат само евра, што значи дека се укинува користењето на српскиот динар. Владата на Косово, пак, најави дека спроведувањето на регулативата за готовинско работење ќе се одвива преку лесна транзиција и дека нема да има казни за поседување валути од други земји.
На оваа одлука на Косово се спротивстави Србија, а меѓународната заедница побара одложување на нејзиното спроведување со образложение дека постои загриженост дека тоа може да има негативно влијание врз косовските Срби.
Народната банка на Србија (НБС) ја отфрли можноста за договор со Централната банка на Косово (ЦБК) и во одговор за РСЕ наведува дека единствената можна опција е да се инсистира на политички формат на разговорите во рамките на дијалогот на постојно ниво.
Дијалогот за нормализација на односите меѓу Србија и Косово се води во Брисел на техничко и политичко ниво, а политичкиот дијалог го водат претседателот на Србија, Александар Вучиќ и премиерот на Косово, Албин (Албин) Курти.
Во одговорот на НБС беше наведено дека е неопходно да се укине одлуката на Приштина.
НБС наведе дека спречувањето на влез и користење на српскиот динар во Косово за готовински трансакции за плаќање значи неможност за исплата на плати, пензии, социјални надоместоци и други приходи на српското население во динари.
Оттаму велат дека оваа одлука на властите во Приштина „директно го загрозува постоењето“ на српското население на Косово.
Досега, динари на Косово пристигнуваа од Србија преку Народната банка на Србија, која има трезор во Лепосавиќ, општина со српско мнозинство на северот на Косово. Динари користеа Банката „Поштански штедилници“, НЛБ Комерцијална банка и Јавното претпријатие „Пошта Србија“.
Од Централната банка на Косово изјавија за РСЕ дека Народната банка на Србија не контактирала со нив и дека не добиле никакви барања, како и дека јавно изразиле подготвеност да се вклучат во дискусии со цел да се олесни процесот на префрлање средства на банкарските сметки на корисниците во евра врз основа на постоечките регионални практики.
Од оваа банка потсетуваат дека секој граѓанин може да прима средства од кој било испраќач во странство на неговата сметка во евра, во која било финансиска институција лиценцирана на Косово.
ЦБК ги повика граѓаните кои се уште немаат жиро-сметка во евра да отворат во која било банка.
Се потсетува и дека не е ограничена конверзијата на средствата, ниту поседувањето на некоја валута за чување или заштеда во физичка форма или на банкарски сметки на лиценцирани банки.
Заменик-премиерот на Косово, Бесник Бисљими (Бислими) рече дека речиси 27 000 припадници на српската заедница добиваат косовски пензии на нивните банкарски сметки во евра, а на истите сметки можат да добиваат и средства од Србија.
„Ова значи дека околу 35 отсто од граѓаните на српската заедница во Косово имаат банкарски сметки, примаат евра и плаќаат во евра како и секој друг граѓанин на Косово“,
рече тој на 31 јануари.
Тој додаде дека косовските власти од нивниот буџет им даваат и други приходи на Србите во евра преку лиценцирани банки, а тие што немаат сметки можат да ги отворат.
Освен Срби, пензии од Србија добиваат и Албанци, Бошњаци, Горани, Роми, а ги плаќале во динари.
Освен пензии, од Србија се исплаќаат и плати во институциите кои работат во српскиот систем и други финансиски средства или помош.
Портпаролот на косовската влада Перпарим Криезиу изјави дека политичарите не можат да бидат над Централната банка на Косово, бидејќи таа е независна институција.
„Мораме да се обидеме се да оди добро, непречено, мирно и безбедно, но за уставноста, законите и одлуките на независните институции не можат да преговараат политичари“,
рече тој.
Претседателот на Србија, Александар Вучиќ, на денот на стапувањето во сила на одлуката на Косово за укинување на динарот се сретна со амбасадорот на Русија, Александар Боцан-Харченко.
Вучиќ на Инстаграм објави дека го информирал рускиот амбасадор за потегот на Приштина, за кој рече дека е насочен против српскиот народ на Косово.
За министерот за надворешни работи на Србија, Ивица Дачиќ, загрижувачки е тоа што меѓународната заедница апелира да се пролонгира одлуката за укинување на динарот на Косово.
Амбасадорот на Соединетите Американски Држави во Косово Џефри Ховениер изрази загриженост дека одлуката за забрана на динарот може да доведе до етнички тензии.
„Ова прашање бара поголемо внимание и разгледување во рамките на дијалогот“,
рече Ховенје по редовната средба со премиерот на Косово.
Тој изјави дека декретот не предвидува како тоа ќе влијае на поединци кои добиваат финансиска помош од српскиот буџет.
Според Договорот за социјално осигурување меѓу СР Југославија и Босна и Херцеговина од октомври 2002 година, се наведува дека тој што плаќа паричен надоместок тоа го прави во својата национална валута.
Во Договорот меѓу Сојузна Република Југославија и Северна Македонија од 2000 година, се наведува дека дознаките се вршат во согласност со платежните трансакции меѓу двете земји.