„Има компании што немаат намалување на цените. Државниот пазарен инспекторат мора да направи анализа и веќе ја прави. Доколку нема објективни причини за тоа што не била намалена цената, и покрај субвенционираната цена на електричната енергија, тогаш нормално нема да добиваат субвенционирана цена на електрична енергија бидејќи таа цена ја субвенционираат граѓаните на државата“, изјави Ковачевски
Прашан конкретно дали сите компании од прехранбениот сектор треба да останат без субвенционираната електрична енергија или само оние што не ги намалиле цените на основните производи, премиерот рече: „Мојот пристап би бил, доколку е можно, за тие одредени компании“
Без субвенционирана цена на електричната енергија да останат само оние компании од прехранбениот сектор што не ги намалиле цените на основните прехранбени производи, а не сите фирми од овој сектор. Ова е пристапот што би го преферирал премиерот Димитар Ковачевски кога ова прашање ќе се најде на владина седница, што веќе го најави министерот за економија Крешник Бектеши.
Имено, ресорниот министер во средата во гостување во емисијата „Економски магазин“ на Алсат ТВ рече дека над 60, а некаде дури и над 70 отсто од компаниите од прехранбениот сектор не ги намалиле цените на основните производи и дека по завршување на анализите на извештајот на Пазарниот инспекторат Министерството за економија ќе и предложи на Владата укинување на мерката за помош на овие компании со субвенционирана цена на струјата.
Ковачевски, пак, денеска изјави дека она што го имаат како податок е дека кај добар дел на прехранбените производи има намалување од седум до 12 проценти и дека во последните два месеци има намалување на инфлацијата, факти кои, како што истакна, не може никој да ги негира.
Премиерот посочи дека има компании кои не ги намалиле цените, но за разлика од Министерот за економија не спомена за колкав број или процент од нив станува збор.
„Има компании кои немаат намалување на цените. Државниот пазарен инспекторат мора да направи анализа и веќе ја прави – дали тоа е поради тоа што не сакале или заради тоа што имаат други елементи во трошковната структура на своите финални производи кои имале покачена цена како суровини, работна сила, транспорт логистика итн. кои што ги оневозможиле. Доколку нема објективни причини за тоа што не била намалена цената и покрај субвенционирата цена на електричната енергија тогаш нормално нема да добиваат субвенционирана цена на електрична енергија бидејќи таа цена ја субвенционираат граѓаните на државата и тоа се средства на граѓаните за да можат да се намалат цените за граѓаните“,
рече Ковачевски кој денеска беше во посета на фабриката „Гересхајмер“ во Технолошко-развојна индустриската зона 2 (ТИРЗ 2).
Прашан конкретно дали сите компании од прехранбениот сектор треба да останат без субвенционата електрична енергија или само оние што не ги намалиле цените на основните производи, премиерот рече:
„Мојот пристап би бил, доколку е можно, за тие одредени компании“
Ковачевски потсети дека мерката за помош на компаниите од овој сектор била џентлменски договор меѓу Владата и стопанските комори, со кој извршната власт се согласила да им излезе во пресрет пред сè на граѓаните за да се намали растот на инфлацијата со намалување на цените на основните прехранбени производи за 10 отсто.
Министерот за економија Бектеши пред два дена изјави дека прелиминарните податоци од извештајот на Пазарниот инспекторат покажуваат дека значителен дел од компаниите што ја искористиле мерката за субвенционирана електрична енергија не го испочитувале договореното меѓу Владата и стопанските комори.
„Би рекол дека над 60, некаде и до 70 отсто, не ја почитувале одлуката и ги задржале истите цени, во однос на месецот ноември, пред да стапи на сила одлуката за субвенционирање на електрична енергија. Затоа Министерството за економија ќе и предложи на Владата да донесеме одлука за укинување на оваа мерка“,
рече Бектеши.
Средствата за фирмите, како што посочи тој, ќе бидат пренаменети за помош на загрозените категории граѓани.