Филипче е одличен лекар, ама како министер е марионета на Заев, оценува лидерот на ВМРО-ДПМНЕ
Критика до министерот за здравство Венко Филипче за менаџирањето на здравствената криза упати вечерва лидерот на ВМРО-ДПМНЕ Христијан Мицкоски во дебатната емисија „Топ тема” на Телма.
Во однос на денешната изјава на министерот за здравство за продолжување на вонредната состојба, Мицкоски вели дека таа одлука е политичка и дека со таквата одлука СДСМ и Зоран Заев сакаат да ја манипулираат јавноста. Мицкоски тврди дека таквата одлука не е донесена на основа на размислувањата на министерот, туку дека таквата одлука е претходно разговарана со лидерот на СДСМ, за исполнување на одредени цели кои не се во ред.
„Филипче е одличен доктор и јас имам доверба во докторот Филипче, но како министер тој човек покажа дека е марионета на Заев. Одлуката да се продолжи вонредната состојба не е поради грижата на Филипче и Заев за здравјето на граѓаните и општата здравствена состојба, туку за изнаоѓање можност за уредби за поткуп. Тоа не е коректно прво кон здравствената фела, а потоа и кон граѓанитe. Филипче, од почетокот на пандемијата, го манипулира народот со одмерени прес конференции и смирувачки тонови, додека бројките што секојдневно ги гледаме, иако тестирањата се во мал број, покажуваат дека се уште се бориме со пандемијата“,
вели Мицкоски.