„Вакви инциденти што длабоко задираат во чувствата на граѓаните не треба да се случуваат. Сè што треба да се решава е помеѓу институциите на системот, дали е тоа Македонската православна црква-ОА, Исламската верска заедница, Католичката црква, локалната самоуправа, државната власт. Преку дијалог мора да се дојде до решение“, вели ексминистерот за внатрешни работи
Сега е црквата во Галате, утре може да ни се случат уште други вакви ситуации со кои би се потпалиле меѓуетничките судири во државата. На Македонија не ѝ се потребни инциденти, особено во делот на меѓуетничките односи, а особено не треба да си играме со правото на вероисповед. Ова денеска го изјави координаторот на пратеничката група на СДСМ во Собранието и ексминистер за внатрешни работи, Оливер Спасовски, коментирајќи го вчерашниот случај во гостиварското село Галате, кога жителите што иницираа акција за уредување на просторот околу црквата „Света Петка“ се пожалија дека полиција по налог на локалната самоуправа ги попречува во намерата.
„Вакви инциденти што длабоко задираат во чувствата на граѓаните не треба да се случуваат. Сè што треба да се решава е помеѓу институциите на системот, дали е тоа Македонската православна црква-ОА, Исламската верска заедница, Католичката црква, локалната самоуправа, државната власт. Преку дијалог мора да се дојде до решение“,
рече тој.
Смета дека е неоправдано и го осуди приведувањето на лицата во овој случај, како и дека не треба да се посегнува на таков начин на однесување кога се работи за верски објекти.
„На кој начин се однесува полицијата и што е она што се прави во изминатиот период не сакам повеќе да кажам. Ќе ги напоменам случувањата на скопскиот аеродром, на граничниот премин ‘Блаце’, овој во Галате, како и низа други примери. Нема оправдување од типот ‘тоа се сегашни или поранешни структури’. Не може во македонската полиција да има сегашни или минати структури, таа треба да им служи на граѓаните“,
вели Спасовски.
Премиерот Христијан Мицкоски денеска, зборувајќи за случајот со црквата во селото Галате, рече дека граѓаните не треба да имаат дилема дека овие корумпирани политички елити од минатото ќе се обидат преку свои центри на влијание во секакви институции да создаваат етнички конфликти и тензии.
Очекува дека ваков тип инциденти ќе има во следниот период, сè додека не се направат измени во Законот за полиција и во Законот за работа во Министерството за внатрешни работи, со што ќе можат да се направат промени во раководните структури во овие институции за да, како што рече, можат реално да ја контролираат ситуацијата.
Министерот за внатрешни работи Панче Тошковски во интервју за ТВ Телма рече дека политички лешинари преку проблемот со црквата во Галате сакаат да предизвикаат меѓуетнички тензии, што е доказ за наводите за дестабилизација на кои предупредуваше во неколку наврати премиерот Христијан Мицкоски.
Инаку, жители на селото Галате вчера се пожалија дека полицијата ги попречува да ја спроведат акцијата за уредување на просторот околу црквата „Света Петка“, која уште во 2001 година е оштетена од пожар.