Техничкиот премиер Оливер Спасовски смета дека мини-извештајот на Европската комисија е напредок за утврдените реформски области на земјава и е добра најава за почеток на преговорите со Европската Унија. За денешната посета од страна на хрватскиот министер за надворешни и европски работи Гордан Грлиќ Радман, Спасовски смета дека е од големо значење и потврда дека Хрватска ни ја дава поддршката на патот кон ЕУ.
„Северна Македонија покажа дека е кредибилен партнер кој за време на целиот евро-интегративен процес ги исполнуваше своите обврски, ги испорача сите очекувани реформи и обврски, и дека тоа ќе и даде доволно силни аргументи на Хрватска, како актуелен претседавач со ЕУ, успешно да го менаџира процесот за одлучување во периодот пред нас. За нас е исклучително важно, после најновиот позитивен извештај на Европската Комисија, одлуката за почеток на преговорите да биде донесена што поскоро“,
вели Спасовски.
Министерот Гордан Грлиќ Радман на средбата истакна посетата на хрватската делегација не е само симболичен гест на поддршка, туку конкретен придонес за пренесување на хрватското знаење и искуство во процесот за да се постигне успешен напредок и затворањето на поглавјата во преговорите со ЕУ.
Спасовски и Радман на средбата се согласиле дека двете земји напредуваат во делот на економската соработка и трговската размена за да се искористат традиционално добрите односи.
Во мини-извештајот што денеска беше усвоен, Европската комисија ја повторува валидноста на препораката за Северна Македонија да почне преговори за членство во ЕУ. Документот се објавува во пресрет на состаноците на Советот на ЕУ кон крајот на месецот, на кои, според најавите, би можело да се донесе одлука за старт на пристапни преговори со Скопје и со Тирана. Таква надеж денеска во Брисел изрази и портпаролката на ЕК, Ана Писонеро, користејќи формулација дека верува оти тоа ќе се случи „многу пред Самитот ЕУ-Западен Балкан во Загреб“ предвиден за почетокот на мај.