Техничкиот премиер Оливер Спасовски формираше кризен штаб кој ќе ги следи и превенира евентуалните економски последици како резултат на коронавирусот.
Во владиниот економски тим се заменик-претседателките, Радмила Шекеринска и Мила Царовска, и повеќемина други министри.
Тие денеска имаа работна средба со претстанвици на стопанските комори, Царинската управа, Управата за јавни приходи и Народна банка. Разговарале за ситуацијата со вирусот „Ковид-19“ и индикациите врз економијата и животот на граѓаните.
„Во оваа ситуација за решавање и ублажување на проблемите кои евентуално би се појавиле во иднина сме заедно и заедно ги подготвуваме сите мерки кои ќе помогнат да немаме застој во економијата и нема да пречат во продолжување на работниот процес на компаниите“,
рече премиерот Спасовски.
Според него, денешниот состав на присутни министри и претставниците на бизнис-асоцијациите е всушност работна средба на Кризен штаб, кој во овој состав ќе продолжи да биде во редовна комуникација во наредниот период кога се применуваат мерки и се упатуваат пораки во врска со справувањето на евентуалните кризи при справувањето со коронавирусот.
„Потребно е сите заеднички да ги почитуваме мерките, кои ги преземаме, бидејќи очигледно е според искуствата на други земји, дека каде се преземени радикални чекори таму има и позитивни резултати за справување со кризата во економијата“,
рече премиерот Спасовски.
Тој додаде дека комуникацијата и информирањето на сите граѓани се одвива на високо ниво, за да се избегнат дезинформациите, лажните вести и создавањето паника.
Заменичката на претседателот на Владата задолжена за економски прашања и координација со економските ресори, Мила Царовска, информираше дека е во постојана комуникација со претставниците на бизнис-секторот во земјата и веќе е разговарано за реорганизација на производствените процеси и воведување на нови смени доколку е потребно.
„Компаниите коишто имаат потреба да ја реорганизираат својата работа во смени, тоа да го направат за да нема застој во работењето, а работниците коишто имаат деца до 10 години да соработуваат во реорганизацијата. Исто така, ги повикуваме компаниите коишто имаат можност да ја организираат својата работа од дома и со тоа да го спречат ширењето на корона вирусот“,
рече Царовска.