Треба да се надминат разликите околу застојот со носењето закони во Собранието, и во тој случај немаме проблем предвремените парламентарни избори да се одржат во предвидениот термин на 12 април, вели министерот за внатрешни работи Оливер Спасовски коментирајќи на вчерашната изјава на премиерот Зоран Заев за можноста да се одложат изборите.
Тоа што е кажано, посочува Спасовски, е факт во услови кога се закочени важни законски решенија без никаква причина.
„Не знам колку тоа предизвика негативни и позитивни реакции, но тоа што беше кажано е факт во услови кога имате најважни законски решенија да бидат закочени и без никаква причина. Меѓутоа, сметам дека сите овие разлики треба да се надминат и доколку се надминат немаме проблем изборите да се одржат на 12 април и да одиме во предвидениот термин“, рече министерот Спасовски во емисијата „Утрински брифинг“ на ТВ „Слободен печат“.
Спасовски тука ги спомена законот за зголемување на пензиите, за прекршоци и, како што рече, други значајни закони, за кои опозицијата аргументира дека се многу во моментов, но според него политичките субјекти мора да прифатат дека нивната одговорност во овој момент е многу важна.