И сега политичките партии ги компензираат недостатоците на изборниот модел со формирање широки коалции во кои има повеќе политички партии, вели универзитетскиот професор Александар Спасеновски, коментирајќи ги аргументите „за“ и „против“ воведување една изборна единица за парламентарните избори
Во врска со евентуалната промена на изборниот модел со воведување една единица за парламентарните избори и дали тоа би довело до понестабилни влади во иднина, универзитетскиот професор Александар Спасеновски, во емисијата „360 степени“ на ТВ Алсат, изјави дека не верува оти тоа ќе се случи.
„Јас сметам дека со една изборна единица ќе произведеме поголема застапеност на партиите во парламентот, меѓутоа, не сум сигурен дека тоа ќе воведе до помала стабилност на парламентарното мнозинство и владата, бидејќи и сега политичките партии ги компензираат недостатоците на изборниот модел со формирање широки коалции во кои има повеќе политички партии“,
смета Спасеновски.
Тој вели дека анкетите покажуваат оти луѓето веруваат дека во Собранието владее квадрипартизам, односно четири поголеми политички партии, но дека во пракса тоа не е така.
„Ако ја анализираме поставеноста во Собранието, ќе видиме дека наспорти тој квадрипартизам секогаш во плуралната историја имало над 10 политички партии и на истиот начин била конструирана и Владата во која имало сигурно повеќе од две политички партии, а најчесто шест, седум, односно влегувале и помали полчитички субјекти кои се дел од коалициите на големите стожерни политички партии. Во таа смисла и со овој изборен модел и со една изборна единица, доколку има конфликтност помеѓу политичките субјекти, таа ќе избие на површина и ќе се рефлектира со помала стабилност на Владите“,
смета Спасеновски.
