„Како што слушам во медиумите, тоа е здружение на граѓани. Не би сакал парите на граѓаните да се трошат за невладини организации, туку за инфраструктурни проекти, како нови училишта, градинки, булевари, спортски сали, паркови и да се креираат услови за младите и Македонци и Албанци и други што ја напуштија државата, да се вратат назад“, рече премиерот
Во Македонија постои една Академија на науките и уметностите е ставот на Владата, на ВМРО-ДПМНЕ и на академиците од различни етнички заедници, рече денеска премиерот Христијан Мицкоски одговарајќи на прашање за вчерашната најава на градоначалниците на Тетово, Гостивар, Желино и Чаир, кои доаѓаат од редовите на владејачката коалиција „Вреди“, за финансиска поддршка за Здружението на граѓани „Академско здружение за науки и уметности на Албанците“.
За тоа дали советниците во тие општини од редовите на ВМРО-ДПМНЕ ќе ги гласаат општинските буџети за поддршка на таков проект, премиерот рече дека таков буџет со етницитет советниците на ВМРО-ДПМНЕ немаат намера ниту, пак, ќе гласаат во рамките на советите.
„Како што слушам во медиумите тоа е здружение на граѓани. Не би сакал парите на граѓаните да се трошат за невладини организации, туку за инфраструктурни проекти, како нови училишта, градинки, булевари, спортски сали, паркови и да се креираат услови за младите и Македонци и Албанци и останати што ја напуштија државата, да се вратат назад“,
рече тој.
Посочи дека не би сакал да разговара за теми што поларизираат или етнизираат, но додаде дека дел од опозициските партии во парламентот ќе го покачат или намалат својот рејтинг ако се разговара на оваа тема.
„Жалам што се одбираат вакви теми за политички пораки, наместо она што го очекуваат од нас граѓаните. Останувам да работам за доброто на сите граѓани без разлика на етничката припадност. Ќе поддржам проекти што ќе значат подобро образование, подобро здравство, подобри услови за водење бизнис, нови училишта, нови градинки, спортски сали и успеси со кои ќе ја промовираме државата низ светот“,
вели Мицкоски.
Градоначалниците на Тетово, Гостивар, Желино и Чаир, од редовите на владејачката коалиција „Вреди“, вчера најавија поддршка од секаков можен аспект, пред сè финансиска, за Здружението на граѓани „Академско здружение за науки и уметности на Албанците“.
Целта на ваквата поддршка, како што велат, е со цел да се забрза динамиката за институционализација на оваа организација.
На 27 јули во јавноста одекна веста дека партнерот во Владата, коалицијата „Вреди“, ќе поддржи формирање Албанска академија на науките и уметностите во земјава. Пораката дојде од Тетово, каде што на средба со група професори, лидерите на „Вреди“ порачаа дека е време да се покаже интелектуалниот капацитет на Албанците во земјава.