Советникот на францускиот претседател Емануел Макрон за европски прашања, Клемент Боне, изјави дека Париз би можел да се повлече од блокирање на пристапните преговори со Албанија и Северна Македонија.
„По напуштањето на ЕУ од страна на Велика Британија, Франција сака да се фокусира повеќе на исток. По Брегзит, најважно е да се надминат разликите во рамките на ЕУ и да се фокусираме на она што нè поврзува“, рече Боне во интервју за германскиот „Франкфуртер алгемајне цајтунг“, пренесува АТА.
Тој додаде дека тоа ќе се случи веднаш штом ЕУ се согласи за планот за проширување.
„Ќе одбиеме одделно да ги оценуваме Албанија и Северна Македонија. Тоа би се спротивставило на нашата желба да се поттикне стабилноста во регионот“, рече Боне.
Минатата недела и францускиот амбасадор во земјава Кристијан Тимоние на трибина во Скопје изјави дека процесите на реформа на методологијата на преговарање и пристапните преговори можат да одат паралелно. Со ова тој како да ја омекна досегашната реторика дека прво е потребна реформа на процесот на преговарање, а потоа би се отвориле преговори со земјите кандидати за членство.