Американски и европски претставници месецов се очекува да пристигнат во Белград во обид да го забрзаат дијалогот за нормализација на односите меѓу Белград и Приштина. Советникот на американскиот Стејт департмент, Дерек Шоле ја откажа посетата на Западен Балкан и Брисел што беше планирана во декември, минатата година поради позитивен тест за ковид-19
Советникот на Стејт департментот Дерек Шоле доаѓа во Белград на 11 или 12 јануари, објави српскиот претседател Александар Вучиќ.
„Верувам во создавање подобри односи со САД, ќе видиме како ќе се одвива. Нема да биде лесен разговор, но верувам дека можеме да разговараме“,
рече Вучиќ на прес-конференцијата.
Советникот на американскиот Стејт департмент ја откажа посетата на Западен Балкан и Брисел што беше планирана во декември, минатата година поради позитивен тест за ковид-19.
Вучиќ рече дека по Шоле во Белград доаѓаат европски преговарачи.
„Потоа, очекувам доаѓање на сите овие експерти од Европа“,
додаде тој.
Американски и европски претставници месецов се очекува да пристигнат во Белград во обид да го забрзаат дијалогот за нормализација на односите меѓу Белград и Приштина.
На страните во дијалогот им беше понуден француско-германски предлог во име на Европската унија, кој беше поддржан и од САД.
Овој документ не е објавен во јавноста, туку е претставен на двете страни.
„Веќе се однесуваат како да е предлог што не смеете да го одбиете“,
рече Вучиќ, инсистирајќи дека станува збор за нацрт-предлог.
На прашањето кое би било прифатливо решение за Белград, Вучиќ рече дека Србија се држи до својот Устав.
„И ние сме подготвени да разговараме за безброј компромисни решенија“,
додаде тој.
Уставот на Србија вели дека Косово е дел од Србија. Од 2011 година, Белград води дијалог за нормализација на односите со Косово под покровителство на Европската унија.
Поранешната српска јужна покраина прогласи независност во 2008 година, која Белград не ја признава.
Вучиќ изјави дека се чека десеттото повлекување на признавањето на независноста на Косово, без да прецизира за која земја станува збор.
Тој изјави дека девет земји го повлекле признавањето на Косово – Сомалија, Буркина Фасо, Габон, Есватини, Либија, Гвинеја, Антигва и Барбуда, Света Луција и Малдиви.
Тој рече дека 106 земји не ја признаваат независноста на Косово, дека 84 ја признале, додека три држави не ја признале „јасно“.
„Можеме ли да им се спротивставиме во Советот на Европа? Тешко. Можеме ли во УНЕСКО? Ќе се бориме“,
рече тој.
Во мај, Косово поднесе барање за членство во Советот на Европа.
Српскиот претседател на прес-конференцијата изјави дека нема да го менува Уставот на Србија за да биде претседател повеќе од два мандата. Тој рече и дека „во првата половина на следната година“ повеќе нема да биде претседател на политичката партија.