Како што информираат од македонското МНР, посетата на шефицата на бугарската дипломатија се одложува поради учеството на Генчовска и на Османи на состаноци во рамките на ЕУ и особено претстојниот вонреден состанок на НАТО
Одложена е посетата на министерката за надворешни работи на Бугарија, Теодора Генчовска, на Скопје.
Како што информираат од македонското МНР, посетата се одложува поради учеството на министерката Генчовска и на министерот Бујар Османи на состаноци во рамките на ЕУ и особено претстојниот вонреден состанок на НАТО.
Во рамките на престојот во Брисел, министрите Османи и Генчовска остварија и билатерална средба на маргините, наведуваат од МНР.
Шефовите на дипломатиите на двете земји вчера во Брисел присуствуваа на работниот појадок на министрите за надворешни работи на земјите членки на Европската Унија, што се одржа на маргините на Советот за надворешни работи на ЕУ. Работниот појадок беше организиран под покровителство на министерот за надворешни работи на Грција, Никос Дендиас, а беше посветен на европското досие на Северна Македонија.
Министерот Османи минатата недела на средба со новинарите ја најави посетата на неговата колешка на 23 и 24 март во Скопје и продолжувањето на разговорите со Бугарија за отворените политички прашања. Османи тогаш потенцира дека се уште постојат разлики, меѓутоа се обидуваат да дојдат до решенија прифатливи за двете страни, како и дека ние сме апсолутно усогласени во ставовите и во позициите согласно резолуцијата на Собранието.