Еден целосно и еден делумно усогласен записник, по недоразбирањата што беа обелоденети во почетокот на декември околу употребата на придавката „македонски“, е исходот од денешната онлајн средба на претставници од двата тима во историската комисија
Со еден усогласен записник, од деветтата седница и со неколку надминати прашања од записникот од десеттиот состанок заврши денешната онлајн средба на македонско-бугарската историска комисија.
Ваквиот исход е оценет како напредок, во кусата информација од состанокот на историчарите од двете земји, по несогласувањата што искрснаа меѓу нив, во последниот период, во врска со употребата на придавката „македонски“ во записниците.
„На денешната средба на Заедничката мултидисциплинарна експертска комисија за историски и образовни прашања помеѓу Северна Македонија и Бугарија, на која се дискутираше за усогласување на содржината во записниците од деветтата и десеттата средба беше постигнат напредок. Двете страни ја усогласија содржината на записникот од деветтата средба, а во однос на десеттата средба беа надминати неколку прашања поврзани со содржината на записникот“,
соопштиле од МИА извори од комисијата, без посочувања на кој начин или со каква формулација се надминати несогласувањата околу придавката.
По последниот 11. состанок на Комисијата, во почетокот на декември, копретседателите од двете страни Драган Ѓоргиев и Ангел Домитров соопштија дека средбата завршила без никаков напредок, затоа што како главен проблем се наметнала употребата на придавката „македонски“.
„Од 9. средба наваму нашите колеги од македонската страна одбиваат да ги потпишат записниците. Тие настојуваа насекаде да се стави ‘македонски’, а тоа не е во согласност со востановената практика“,
изјави тогаш Димитров.
Ѓоргиев, пак, рече дека постои различно толкување на Преспанскиот договор и дека неговите бугарски колеги целосно ја лимитираат употребата на придавката ‘македонски’.
Денешниот (онлајн) состанок траел близу пет часа, а на него учествуваа по тројца претставници од С Македонија и Бугарија, кои, како што беше најавено, разговарале само за текстовите на записниците што остана непотпишани, но не и за историски прашања.
До наредната редовна средба, која е планирано да се одржи на 25 и 26 февруари, ќе се продолжи со работа во останатите прашања од записникот од 10. и од последната 11. средба на мешовитата комисија. Оваа година е планирано да се одржат пет состаноци на македомско-бугарската комисија, која во изминатиот период успеа да се усогласи околу дел од историските учебници во двете земји, но не и околу прашањето за Гоце Делчев. Повторно се проблематизира и прашањето за Цар Самоил кое се сметаше за затворено.