Ѓорѓиев рече дека на средбите на комисијата не се разговара воопшто за македонскиот идентитет и јазик, како што се добива впечаток во јавноста
Претставувањето на Цар Самоил и употребата на придавката „македонски“ во протоколот – се двете прашања на кои заглавила историската комисија со Бугарија, како што изјави вечерва копретседавачот од македонска страна Драган Ѓоргиев, на ТВ 21, каде што гостуваше заедно со колегата Петар Тодоров, кој е член на мешовитата комисија.
„Последната средба заглави на две места. Од наша страна, понудивме при претставувањето на Цар Самоил во учебниците, учениците да имаат две перспективи на таа Самоилова држава: дека е наследник на средновековното Бугарско царство, но и дека има тези дека е независно царство. Од бугарска страна се инсистираше да биде само царство кое ја наследува традицијата на првото Бугарско царство. Тука заглавивме, тие инсистираа само на нивното гледање“,
рече Ѓорѓиев, и додаде дека тука нема договор, и дека ќе се продолжи со барање решение.
Вториот момент, како што рече, е придавката „македонски“.
„Ние записниците ги потпишуваме на македонски јазик, тие на бугарски. Тука немаме проблем. Главниот проблем е придавката ‘македонски’ во самиот протокол. Ја употребуваме ние придавката низ дискусијата, но кога ќе треба да ја ставиме на протокол имаме проблем. Од седмата средба се појави тој проблем, до шестата немаше“,
рече Ѓорѓиев.
Ѓорѓиев рече дека на средбите не се разговара воопшто за македонскиот идентитет и јазик, како што се добива впечаток во јавноста.
Ѓоргиев и Тодоров, во гостувањето на ТВ 21, рекоа дека интервјуто на Зоран Заев за БГНЕС влијаело на мислењето на членовите на бугарската комисија.
Тодоров рече дека интервјуто на премиерот го гледа како начин да „пробие“ на тврдиот став на бугарската страна.
„Го гледам тоа испровицирано од толкувањето на бугарските политичари и го гледам на некој начин да пробие. Но таквите изјави предизвикуваат реакции, отвораат дебати, а она што можеше да се примети и дека дебатата отиде во еден друг правец“,
рече Тодоров.
Во наредните денови ќе има нова средба на комисијата. Ѓорѓиев вели дека тоа ќе биде техничка средба, за да се реши прво ситуацијата со придавката „македонски“.