Иако игротеките од 11 март престанаа со вршење на својата дејност, прославувањето на детските родендени не престана и продолжува во домашни услови, без соодветни протокол, велат од Групацијата на забавни, рекреативни и едукативни дејности
Групацијата на забавни, рекреативни и едукативни дејности и игротеки при Сојуз на стопански комори на Македонија бара финансиска помош од државата. Од Комисијата за заразни болести, пак, бараат да го разгледа протоколот за работа на игротеките што тие сами го подготвиле следејќи ги и прифаќајќи ги позитивните примери на земјите од соседството.
Групацијата бара и да се овозможи, по тримесечна пауза, игротеките да почнат со работа. Оттаму нагласува дека, иако игротеките од 11 март престанаа со вршење на својата дејност, прославувањето на детските родендени не престана и продолжуваат да се организираат во домашни услови, без соодветни протоколи.
„Бараме Комисијата за заразни болести да даде препорака да ги отвориме објектите по примерот на земјите од соседството, кои повеќе од еден месец беспрекорно работат, затоа што животот продолжува со почитување на протоколите за заштита на здравјето“,
рече Трајко Николовски, претседател на Групацијата на денешната прес-конференција.
Тој нагласи дека компаниите од секторот најпрво бараат финансиска поддршка во висина на половина од просечниот месечен бруто приход земен од времето кога работеа, секој месец без прекин на неодредено време до нивно повторно отворање, како би можеле да ги сервисираат закупнините, режиските трошоци, платите и придонесите во периодот кој им претстои затоа што, како што рече, моментално не работат, имаат промет нула и се уште се затворени.
„Во време кога се бориме за секое работно место, кога сите сакаме нови инвестиции, нови вработувања, јавно прашуваме, што ќе се случи со нашите инвестиции во кои работат повеќе од илјада луѓе и егзистираат исто толку семејства. Дали треба да дозволиме овие 1.000 семејства да останат без егзистенција, да останат без работните места кои сами ги створиле и да изгубат се што вложиле“,
посочи Николовски.