Од Управата за хидрометеоролошки работи од утре најавуваат период на променливо облачно и посвежо време, а на повеќе места ќе има пороен дожд, грмежи и засилен ветер
Денеска времето во земјава ќе биде сончево со мала до умерена облачност и слаб до умерен ветер од променлив правец, информираат од Управата за хидрометеоролошки работи (УХМР). За попладне, оттаму најавуваат услови за изолирана појава на нестабилност со краткотраен пороен дожд и ретки грмежи.
Минималната температура се движи во интервал од 11 до 20 Целзиусови степени, а максималната ќе достигне од 27 до 33 степени.
За Скопје синоптичарите прогнозираат слично време, сончево со мала до умерена облачнсот и слаб ветер од североисточен правец. Минималната температура во главниот град се спушти до 17, а максималната дневна ќе достигне до 33 Целзиусови степени.
Од Управата за хидрометеоролошки работи од утре најавуваат период на променливо облачно и посвежо време, а на повеќе места ќе има пороен дожд, грмежи и засилен ветер. Локална овие процеси ќе бидат изразени во форма на невреме, со интензивен пороен дожд, каде наместа за кратко време ќе наврнат над 25 летри на квадратен метар, грмежи, силен ветер од над 70 километри на час и појава на град. Овие процеси се очекува да бидат најизразени во вторник.