Според весникот, Кирил Петков, кој се смета за иден премиер, важи за прагматичен човек кој гледа напред и кој не сака да се загуби во честакот на балканските дебати за историјата, но и тој треба да има обѕир кон коалициските партнери, меѓу другите и кон делумно националистичката Социјалистичка партија
Бугарија би можела со години да го блокира приклучувањето на Северна Македонија во ЕУ, пишува германскиот весник „Франкфуртер алгемајне цајтунг“ (ФАЦ) во текстот со наслов „Софиското фалсификување на историјата“, пренесува МИА.
Бугарија е пред добивање нова влада, а во Брисел се надеваат дека земјата ќе се откаже од ветото за почеток на преговорите на ЕУ со Северна Македонија, наведува весникот и појаснува дека владата на Борисов ги спречила преговорите со образложенија „кои не само Брисел ги смета за апсурдни“.
„Скопје би морало да признае дека македонскиот јазик е всушност само бугарски дијалект и дека македонската нација се развила од бугарството, бара меѓу другото Софија. Но оној кој верува дека само со промена на владата во Бугарија повторно ќе се врати разумот и дека бизарните академски дебати нема веќе да стојат на патот на ЕУ-политиката на Балканот, тој може да се излаже. ‘Спорот за името’ помеѓу Атина и Скопје ја спречуваше западната интеграција на балканската држава повеќе од четврт век, пред во 2018 година да биде решен со преименувањето на Македонија во Северна Македонија. Бугарско-македонскиот историски спор би можел да трае исто така многу години“,
наведуа весникот, пренесува „Дојче веле“.
Според ФАЦ, Кирил Петков, кој се смета за иден премиер, важи за прагматичен човек кој гледа напред и кој не сака да се загуби во честакот на балканските дебати за историјата.
„Но, и тој мора да има обѕир кон коалициските партнери, меѓу другите и кон делумно националистичката Социјалистичка партија. А, не само за нејзините приврзаници важи: бугарското нерасположение кон Северна Македонија е подлабоко отколку што тоа им се чини на многумина кои гледаат од страна. На националистичка линија по ова прашање е и претседателот на државата Румен Радев (како и неговиот претходник Росен Плевнелиев). Но, тоа порано во странство не паѓаше в очи поради тоа што бугарските позиции беа во сенка на гласниот грчко-македонски ‘спор за името’,
наведува весникот.
ФАЦ натаму посочува дека Бугарија бара бугарското малцинство кое живее во Северна Македонија да биде спомнато во Уставот, и додава дека неопходното двотретинско мнозинство за такво нешто во Скопје можеби ќе се најде полесно ако Бугарија со децении не ги исклучува ссопствените граѓани кои се дефинираат како Македонци.
„Обесправувањето на (денес многу малото) македонско малцинство во Бугарија го преживеа распадот на комунизмот. Софија дури игнорираше повеќе пресуди на Европскиот суд за човекови права за да се држи до фикцијата дека во земјата нема македонско малцинство. Според претседателот Радев, Северна Македонија мора да го спречи и ‘говорот на омраза’ против Бугарија. Од ‘медиумите, музеите, јавноста и државната политика’ морало ‘да исчезне извртувањето на историјата’,
се наведува во текстот на ФАЦ, како што пренесува МИА.
Весникот оценува дека Радев бара Скопје да ја цензурира дебатата во земјата, претставена како „говор на омраза“.
„Тоа се однесува на периодот од 1941 до 1944 година, кога Бугарија, во тоа време окупирала најголем дел од денешна Република Северна Македонија, како и делови на северна Грција, при што околу 7 200 Евреи во земјата од страна на бугарските окупаторски власти биле собрани во гета и депортирани во Треблинка. Сепак, Софија денес тврди дека се работело за ‘говор на омраза’ кога во Северна Македонија спомениците или спомен-плочите потсетуваат на времето на ‘бугарската фашистичка окупација’. Фалсификувањето на историјата досега не е критериум за приклучување во ЕУ. Но, се чини дека Бугарите сакаат да го направат да биде критериум. На такво нешто Северна Македонија не може да се согласи веќе поради самото почитување на вредностите во ЕУ“,
заклучува ФАЦ.