Ова е реакцијата на Собранието откако Здружението на новинарите на Македонија (ЗНМ) реагираше дека неколкумина странски новинари имале привилегиран третман во однос на домашните новинари на вчерашната собраниска седница за време на изборот на техничката влада и оти биле сместени во дипломатскиот дел на терасата во пленарната сала
Поради зголемениот интерес за следење на пленарната седница од вообичаено, го ставивме на располагање целиот капацитет на галеријата – ова е реакцијата на Собранието откако Здружението на новинарите на Македонија (ЗНМ) реагираше дека неколкумина странски новинари имале привилегиран третман во однос на домашните новинари на вчерашната собраниска седница за време на изборот на техничката влада и оти биле сместени во дипломатскиот дел на терасата во пленарната сала.
Од Собранието додаваат дека не станува збор на привилегиран однос кон одредени новинари, ниту, пак, за за непринципиелен третман кон новинарите и медиумските работници од домашните медиуми.
„Сакаме да истакнеме дека поради зголемениот интерес на претставници од домашните, но и од странски медиуми, кои уредно беа акредитирани до 26 јануари годинава, беше увидено дека интересот за следење на пленарната седница е значително зголемен во однос на вообичаената пракса, поради што го ставивме на располагање целиот капацитет на галеријата“,
велат од Собранието.
Реакцијата на ЗНМ за привилегиран однос кон четворица странски новинари, пак, следеше откако порталот „Икс“ објави дека Батон Хаџиу – познат албански аналитичар со потекло од Косово, Адриатик Келменди – новинар на косовската телевизија Клан, Бленди Февзиу – водител на популарното ТВ-шоу „Мислење“ (Опиниони) на ТВ Клан Албанија и Берат Бужала – директор и главен и одговорен уредник на косовскиот портал „Национале“, беа ВИП-гостите на ДУИ за време на вчерашниот избор на техничката влада.
Медиумот објави дека тие цел ден се превезувале со службено возило од Министерството за политички систем со кое раководи Артан Груби. Според сторијата на „Икс“, тие прво пиеле виски и пушеле цигари во канцеларијата на Али Ахмети, а потоа ги зазеле столчињата во ВИП-ложата во пленараната сала на македонскиот парламент.