Како што посочи координаторот на пратеничката група на ВМРО-ДПМНЕ, која е еден од предлагачите, станува збор за мали измени, со кои во членот 5 од Законот за безбедност на сообраќајот на патиштата зборовите „12 февруари 2024 година“ се заменуваат со зборовите „31 декември 2024 година“. Ова значи дека граѓаните ќе можат да управуваат со своите возила на територијата на држава до крајот на оваа година со возачки дозволи кои го содржат името Република Македонија
Со 88 гласа „за“, ниту еден „против“ и без „воздржани“, пратениците попладнево на итната 144. седница што ја закажа претседателот на законодавниот дом Јован Митрески ја изгласаа потребата од измени на Законот за безбедност на сообраќајот на патиштата по скратена постапка со кои треба да се пролонгира рокот на важење на возачките дозволи со старото уставно име и по истекот на денешниот ден.
Предлагачи на измените се координаторите на пратеничките групи и претставници на други партии во Собранието, односно Никола Мицевски (ВМРО-ДПМНЕ), Мартин Коствоски (СДСМ), Вјолца Адеми (ДУИ), Аднан Незири ( Алијанса за Албанците), Димитар Апасиев (Левица) и Павле Трајанов (Демократски сојуз).
Договорот за донесување на законските измени кои, како што наведе Мицевски образложувајќи го предлогот, е постигнат со консензус меѓу сите пратенички групи, а целта е да се изнајде брзо решение за проблемот со замената на личните документи, конкретно оној со возачките дозволи.
„Сакам да ја информирам јавноста, како што најавивме утрово, дека пред малку заврши координацијата и консултација помеѓу сите политички субјекти и координатори на пратеничките групи во Собранието со цел изнаоѓање брзо решение за проблемот со личните документи на граѓаните. Во интерес на граѓаните и со цел нивно ослободување од дополнителен притисок и хаос што се создаде овој период преку меѓусебен консензус сите координатори и други пратеници од сите парламентарни политички партии дојдовме до заедничко решение на оваа седница да предложиме усвојување на измени на Законот за безбедност на сообраќајот на патиштата“,
рече Мицевски.
Како што посочи тој, станува збор за мали измени со кои во членот 5 од Законот за безбедност на сообраќајот на патиштата зборовите „12 февруари 2024 година“ се заменува со зборовите „31 декември 2024 година“.
Инаку, актуелниот член од Законот гласи:
„Возачките дозволи и возачките книшки, кои го содржат натписот „Република Македонија“ издадени до денот на започнувањето на примената на овој закон, ќе важат до истекот на рокот на важење кој е наведен во возачката дозвола, најдоцна до 12 февруари 2024 година“.
Ова значи дека граѓаните ќе можат да управуваат со своите возила на територијата на држава до крајот на оваа година со возачки дозволи кои го содржат името Република Македонија.
„Сметаме дека ова законско решение ќе помогне во надминување на дел од проблемите со личните документи и возачките дозволи на граѓаните и ќе овозможи намалување на долгите редици на чекање и олабавување на целата напнатост којашто ја има кај граѓаните“,
додаде Мицевски.
Тој воедно упати и апел до сите политички субјекти внатре, но и како што рече надвор од Собранието да не ја злоупотребуваат оваа чувствителна тема бидејќи единствено што е потребно во овој момент е изнаоѓање брзо и ефикасно решение на проблемот со личните документи на граѓаните.
Откако предлогот за потребата од донесување на законските измени беше усвоен, Собранието со 91 глас „за“ и ниту еден „против“ и „воздржан“ го усвои дневниот ред на седницата со оваа единствена точка на дневниот ред.
Продолжението на седницата собранискиот спикер ја закажа за во 16:20 часот, до кога собраниската Комисија за одбрана и и безбедност, како матично работно тело, и Законодавно правната комисија треба да ја завршат расправата во однос на предложеното законско решение.
Итаница со новите измени на Законот доаѓа откако вчера Министерството за внатрешни работи ги извести граѓаните дека од 00 часот на 13 февруари 2024 година ќе важат само возачките дозволи со името Република Северна Македонија. Истото тоа се однесува и за пасошите. Ваквите одредби произлегуваат од Преспанскиот договор.
Иако претходно денеска координаторот на пратеничката група на ВМРО-ДПМНЕ во Собранието, Никола Мицевски, и министерот за внатрешни работи во техничката влада од редовите на опозициската партија, Панче Тошковски, соопштија дека освен измена на Законот за безбедност во сообраќајот на патиштата ќе предложат и измена на Законот за патните исправи на државјаните, сепак, на итната седница измени на вториот закон не беа споменати.
Денеска од тетовско Селце техничкиот премиер Талат Џафери рече дека дел од можните решенија ќе ги дефинираат со пратениците како закон, а другиот дел преку одлука на Владата, односно ќе се согледаат сите аспекти и во зависност од можностите ќе се употребат како решенија за надминување на проблемите во врска со прашање што ќе преземе за надминување на проблемите со употреба на возачките дозволи и пасошите чиј рок согласно Преспанскиот договор истекува вечерва на полноќ.
Законски измени со кои би се овозможило возачките дозволи да може да се користат за внатрешна употреба и по 12 февруари, а граѓаните да не се казнуваат ако во сообраќај бидат затекнати со возачка дозвола со старото уставно име на државата, денеска излезе и СДСМ.