Продолженото отсуство на двајца пратеници од мнозинството, кои се во изолација поради ковид-19, а од друга страна условувањата од опозицијата за обезбедување кворум, доведоа до тоа Џафери да ја откаже седницата што требаше да почне денеска, а чиј нов термин за одржување е неизвесен засега
Како што и најави, претседателот на парламентот Талат Џафери ја симна од дневен ред седницата што требаше да почне денеска, а околу која имаше големи очекувања, со оглед на тоа што на дневен ред беа и предлог-законите што произлегуваат од петтиот сет антикризни мерки.
Сепак, продолженото отсуство на двајца пратеници од мнозинството, кои се во изолација поради ковид-19, и од друга страна условувањата од опозицијата за обезбедување кворум, доведоа до тоа Џафери да ја откаже седницата, чиј нов термин за одржување е неизвесен засега.
Собраниската агенда за наредните десетина дена е речиси празна, со исклучок на редовната седница за пратенички прашања, закажана за четврток, кога законодавниот дом би можел да заседава и без кворумот (од најмалку 61 пратеник) што е потребен за да може да се одлучува.
„Од денеска натаму нема да ризикувам да свикувам седница на која ќе влезат 60 пратеници во салата, а другите ќе дојдат за да се потпишат и да ме условуваат за кворум“,
изјави вчера Џафери на прес-конференција што ја свика откако ја прекинал редовната координација поради условувањата од опозицијата.
На дневен ред на 36. собраниска седница беа и двете интерпелации поднесени од ВМРО-ДПМНЕ за министерот за правда Бојан Маричиќ и за вицепремиерот Љупчо Николовски, поднесени токму од опозицијата.
Меѓу точките на дневен ред на оваа седница се закони од петтиот сет мерки за справување со ковид-19: за финансиска поддршка на физички лица кои вршат самостојна дејност за февруари и март 2021 година; за финансиска поддршка на работодавачите погодени од здраствено-економската криза, како и измените на Законот за данокот на личен доход. Како прва точка е предложено и продолжување на кризната состојба на јужната и северната граница, за што околу 400 амандмани имаат поднесено опозициските Алијанса на Албанците и Алтернатива, нешто што досега, како што потенцира Џафери, не се случило.
Според Џафери, опозицијата ја злоупотребува здравствената состојба на пратениците во услови на ковид-19 и му поставува ултиматуми. Според него, проблемот настанал откако вчера координаторот на пратеничката група на ВМРО-ДПМНЕ побарал на седницата да се разгледуваат само продолжувањето на кризната состојба и трите точки поврзани со мерките за ковид-19, а не и другите 26. Практично, опозицијата побарала посебна седница само за тие четири точки.
Координаторот на пратеничката група на ВМРО-ДПМНЕ Никола Мицевски рече дека тоа го предложиле откако вчера станало јасно дека парламентарното мнозинство нема да има 61 пратеник, а со цел да им се помогне на граѓаните и на стопанството зашто роковите за законите се одамна поминати.
„Законите од овој петти сет на економски мерки не се блокирани од ВМРО-ДПМНЕ, тие се блокирани од СДСМ и ДУИ. Нашиот предлог експресно беше одбиен. Денес стана јасно кој блокира во Собранието, на кого не му е грижа за здравјето на граѓаните и кој се занимаваат со политиканство и злоупотреба на здравствената криза“,
рече Мицевски.
Според координаторот на ВМРО-ДПМНЕ, власта и пратениците на СДСМ го користат овој пакет закони за да ја „искористат опозицијата да им обезбеди кворум да протуркаат штетни закони“.
Освен седницата за пратенички прашања, во Собранието за наредните десетина дена се закажани само седница на неколку комисии предводени од опозицијата. Денеска требаше да заседава Комисијата за надзор над разузнавачките служби и да го разгледа извештајот за работата на Агенцијата за национална безбедност за 2020 година. За понеделник, пак, е закажано продолжение на седницата на Комисијата за финансирање и буџет, чиј претседател е Тимчо Муцунски од ВМРО-ДПМНЕ, на која треба да се расправа за заемот за проектот за трамвај во Скопје.