Справување со последиците од пандемијата, зачувување на работните места, создавање функционална економија и враќање на економскиот раст на 4 отсто, унапредување на животниот стандард на граѓаните и натамошен раст на платите, силни институции, неселективна правда и борба против корупцијата, изградба на општество со еднакви шанси за сите, како и активно учество во сите процеси и активности на земјата како членка на НАТО и почеток и успешно завршување на преговорите за членство во ЕУ, се дел од приоритетите на новата Влада, во чија реализација премиерот Зоран Заев очекува да се вклучат и новите заменици на министри што ги предлага.
„Од нив очекувам и активно учество во сите активности како земја- членка на НАТО и максимално вклучување во процесите за почеток и завршување на преговорите по поглавја за членство во ЕУ, како и во политките за добри меѓуетнички и меѓусоседски односи“,
рече Заев, образложувајќи ги предлозите.
Предлогот за избор на заменици на министри Владата до Собранието го достави минатиот петок.
Пред да ја почне расправата за избор на замениците- министри, Собранието го верификуваше мандатот на пратеникот Диме Велковски, по оставката на пратеникот Дамјан Манчевски.