Со 92 гласови „за“, ниту еден воздржан или против, пратениците на денешната седница во Собранието донесоа одлуката за прогласување кризна состојба на јужната и на северната граница заради висок ризик од зголемен обем на влез и транзитирање на мигранти и заради заштита на јавното здравје во услови на пандемија.
Изгласувањето на оваа одлука следува откако истата вчера помина едногласно во Комисијата за одбрана и безбедност.
Покрај оваа, се донесоа и одлуки за испраќање на припадници на Армијата за учество во меѓународната операција на Организацијата на Обединетите нации УНИФИЛ во Либан.
Седницата е во тек, а на дневен ред се и предлог-измените во Законот за здравствената заштита, со кои се ограничува сумата што ќе ја плаќаат граѓаните во приватните болници, како и се забранува преминување на кадар од јавното во приватното здравство во време на кризна состојба.
Како последна точка од дневниот ред е и интерпелацијата за министерот за внатрешни работи, Оливер Спасовски, поднесена од Алијанса за Албанците и Алтернатива поради бегството на поранешниот директор на УБК, Сашо Мијалков.
Опозициската ВМРО-ДПМНЕ, пак, реагираше за интерпелациите за вицепремиерот Љупчо Николовски и Бојан Маричиќ. Тие беа повлечени од дневниот ред на претходната седница, па бараше да бидат ставени на оваа, додека претседателот Талат Џафери, пак, беше на ставот оти тие се повлечени од процедура.