Вицепремиерот Груби вели дека систематизацијата на сите вработени според Рамковен договор, согласно принципот за правична застапеност во државниот и јавниот сектор, е дел од коалицискиот договор меѓу СДСМ и ДУИ
Првиот вицепремиер во Владата, Артан Груби, денеска изјави дека се формира работна група која ќе ги систематизира вработените по Рамковен договор, кои не се распоредени и оти се размислува за закон за овие лица.
„Тоа е дел од нашиот коалициски договор, помеѓу ДУИ и СДСМ, за систематизација на сите вработени по Рамковен договор по Програмата К-5 кои беа вработени низ годините за да се подигне адекватната и првична застапеност на сите заедници, не само на Албанците туку и на Ромите, Турците, па дури и на Македонците и на сите други заедници во институциите на државната администрација и во јавниот сектор. Договорот ќе го имплементираме, ќе ги систематизираме сите тие луѓе што сакаат да работат и кои очекуваат да бидат систематизирани. Формиравме работна група за да ги анализираме нивните стручни подготовки, колку имаме економисти, правници, ИТ-инженери, колку се со средно образование… за понатаму со МИОА да ги најдеме празните места“,
изјави Груби.
Тој не очекува овој процес да заврши до крајот на годината. Рече дека има одлука за систематизирање на околу 700 вработени, ама некои од институциите одбиваат да ги прифатат.
„Размислуваме за посебен закон само за оваа категорија вработени и се надеваме дека тоа најдоброто можно решение за овој проблем“,
рече Груби.
Во однос на предлогот за етничко субвенционирање на вработување во приватни компании, одговарајќи на новинарско прашање, вицепремиерот рече дека нема донесено одлука за ваква мерка, туку дека само е отворена дебата во јавноста.
„Не беше идејата да се наметне вработување на Албанци или на која било друга заедница, туку да се адресираат прашањата на еднаквост, не само во правата туку и во обврските што ние би ги имале. Зошто да не се отворат сите тие компании за луѓе да аплицираат и да има правична и адекватна застапеност насекаде низ општеството – да има правилен пристап за сите. Ако ја видите етничката застапеност во сите тие компании, па безмалку би биле 100 отсто претставени само од македонската етничка заедница. Таму нема ниту Роми, ниту Турци, ниту Бошњаци… Нема ниту Власи, ниту Срби, па ниту Албанци во некои од тие компании. И затоа велиме да имаме еднаков пристап, дали тоа ќе биде преку субвенција, дали преку други форми на соработка со тие компании“,
рече Груби.
Во моментов, потенцира тој, не постои мерка, отворена е дебата за да се види како би било најдобро сите да се чувствуваме еднакви во нашето општество.