Собранието со оценка 5,4 падна на „испит“ за квалитет на дебатата меѓу пратениците

Пратеникот Бојан Стојаноски од редовите на ВМРО-ДПМНЕ ги надзборувал сите други пратеници во второто полугодие од минатата година, според Извештајот на Институтот за демократија, кој укажува дека опозиционерите, генерално, зборувале многу почесто од пратениците од мнозинството

На скала од еден (најниско) до десет (највисоко), дискусијата во законодавниот дом во периодот од јули до декември 2021 година е оценета со 5,4, со што не ја добива минималната потребна оценка за да се именува како дебата. Оценката 5,4 означува пад на квалитетот на дискусијата во Собранието, споредбено со периодот јануари-јуни 2021 година, кога оценката на квалитетот на дебата беше 5,6.

Намалувањето на квалитетот на собраниската дебата во второто полугодие на 2021 година е резултат на влошувањето на речиси сите параметри што придонесуваат во оценката на квалитет на дебата, како степенот на аргументација, степенот на почит на говорникот кон другите пратеници и нивните аргументи, отвореноста за прифаќање на туѓите аргументи и менување на сопствените ставови поради поквалитетни аргументи изнесени во расправата. Ова го покажува Извештајот од набљудувањето на квалитетот на дебатата во Собранието во периодот јули – декември 2021 што го спроведе Институтот за демократија „Социетас вивилис“ – Скопје.

„Генерално, квалитетот на дебатата, како и во претходните периоди, е на ниско ниво, со голем простор за подобрување“,

велат од Институтот.

Опозицијата со поголемо учество во дискусиите од власта

Како што се наведува во извештајот, опозицијата зема поголемо учество од власта во собраниските дебати. Според политичката припадност на говорниците во овој период, произлегува дека пратениците од мнозинството, составенo од СДСМ и коалицијата, ДУИ и ДПА, учествуваа во 38 отсто од набљудуваните дискусии, додека опозицијата, составена од ВМРО-ДПМНЕ и коалицијата, Коалиција „Алијанса за Албанците и Алтернатива“ и Левица учествуваа во 62 проценти од набљудуваните дискусии.

Родова еднаквост помеѓу десетте најактивни пратеници

Најактивен пратеник во Собранието во периодот од јули до декември минатата година е пратеникот Бојан Стојаноски од редовите на ВМРО-ДПМНЕ, кој во овој период на собраниската говорница се задржал најдолго односно вкупно 546 минути. Според тоа колку пати се јавиле за збор, најактивен е, исто така, пратеникот Бојан Стојаноски кој зеде збор 92 пати.

Меѓу десетте пратеници кои најдолго се задржаа на говорницата во овој период на набљудување се најдоа пет пратенички, Гордана Сиљјановска-Давкова, Жаклина Лазаревска, Марија Георгиевска, Лидија Петкоска и Бети Стаменкоска Трајкоска.

Намалена заинтересираност за дискусија помеѓу пратениците

Според типот на набљудувани дискусии во овој период, поголем дел отпаѓаат на говори (42 проценти), додека 28 отсто од дискусијата отпаѓа на реплики и 24 отсто на контрареплики. Ова укажува на релативно задоволително ниво на интеракција помеѓу пратениците, но во споредба со претходните периоди опаѓа бројот на реплики. Тоа укажува на генерално помалку интерес за дискусија помеѓу пратениците, стои во Извештајот.

Пратениците 91 пати го користеле правото на процедурална забелешка за искажување свои ставови и мислења, што укажува на раст на бројот на процедурални забелешки споредено со двата претходни периоди на набљудување на дискусијата.

Во периодот од јули до декември 2021 година, во парламентот се одржала само една седница за пратенички прашања, а според Деловникот на Собранието, законодавниот дом е задолжен да одржува седница на пратенички прашања секој последен четврток од месецот.

„Овој период се одржа само една седница на пратенички прашања, со што се ограничуваше можноста на Собранието за контрола и надзор на извршната власт“,

стои во Извештајот.