Смешно е да се тврди дека се изгубени 14 животи поради некаков кабел: Николоски за вештачењето за пожарот во Тетово

Потпретседателот на ВМРО-ДПМНЕ обвини дека СДСМ и ДУИ си нарачале извештај од тетовското обвинителство за, како што рече, да ја сокријат одговорноста додека Заев побара време да го прочита извештајот пред да даде свој коментар

Во најмала рака, смешно е да се тврди дека 14 човечки животи се загубија поради некаков кабел, оцени денеска потпретседателот на ВМРО-ДПМНЕ, Александар Николоски, коментирајќи го извештајот од вештачењето за причините за пожарот во тетовската модуларна болница, кое МВР го доставило до обвинителството во Тетово, во рамки на истрагата за трагедијата.

Прегреан кабел на дефибрилатор е причина за пожарот во болницата во Тетово, според вештачење на МВР

Според Николоски, СДСМ и ДУИ си нарачале извештај за да ја скријат одговорноста.

„Очигледно е дека СДСМ и ДУИ, преку обвинителството во Тетово, си нарачуваат извештај каков што им одговара, со цел да скријат одговорност“,

изјави Николоски при посетата на Кисела Вода, во рамки на изборната кампања, а одговарајќи на новинарско прашање во врска со извештајот за модуларната болница во Тетово.

Според него, најодговорен за целиот случај е министерот за здравство Венко Филипче, бидејќи изградбата на модуларните болници е во неговото Министерство.

„И да е така како што тврди тетовското обвинителство, повторно одговорноста е кај Венко Филипче, затоа што тој е министер за здравство и тој е најодговорен за изградбата на модуларните болници и за нивното функционирање, затоа што тие се во рамките на Министерството за здравство и знаеме дека со промените на Законот за градење целосно е прескокната процедурата на кој начин истите требало да бидат изградени“,

рече Николоски.

ВМРО-ДПМНЕ ќе поднесе ново барање за анкетна комисија за Тетово со придавката „Северна“, најави Мицкоски

Државното обвинителство денеска го објави извештајот од вештачењето на МВР, посочувајќи дека тоа е само еден од доказите во истрагата, додека паралелно течеше прес-конференција на премиерот Зоран Заев во Владата. На прашање за извештајот, Заев побара време за да го прочита пред да даде свој коментар. Прашан што тоа конкретно ќе значи за понудените оставки, рече дека веднаш, откако ќе ги осознае сите информации за тоа што е објавено, ќе го каже и својот став за оставките на министерот и на заменик-министерот за здравство.

Заев изрази благодарност до институциите што ги објавуваат извештаите, затоа, како што рече, граѓаните ги чекаат.

„Тоа е најважното. Самите извештаи мора да бидат професионално и навремено завршени и секоја информација што им дава дополнителни одговори на нашиот народ, на семејствата на загинатите наши сограѓани е респонзивност на институциите“,

посочи Заев.

Заев за случајот со тетовската болница: Прво да заврши истрагата, а потоа политичарите ќе зборуваат