Сите зголемувања на плати, кои не се исплатени од март, наредната недела ќе легнат на сметките на вработените во здравствениот сектор, најави министерот за здравство Венко Филипче.
Проблемот, рече тој, е надминат и парите за сите заостанати плати ќе легнат наеднаш.
„Денеска им се префрлија средствата за зголемување на платите на сите вработени во здравствениот сектор, не само здравствените работници. Имаше проблем со трезорскиот систем во Фондот кој вчера е надминат и од понеделник ќе почнат исплатите за зголемувањето на платите. Тоа значи дека сите заостанати од изминативе месеци, од март, зголемувањата од 5 проценти, ќе бидат исплатени следната недела наеднаш и од следниот месец редовно 5 месеци како додаток за работа со ковид на сите вработени во системот на јавно здравство“,
рече Филипче.