Според процедурите на Обвинителството, прво се распишува национална потерница, а потоа се дава изјава за распишување на меѓународна потерница. Со таа изјава, се потврдува дека доколку осомничените бидат приведени во странство, ќе се бара нивна екстрадиција во земјава
Основното јавно обвинителство Скопје (ОЈО Скопје) вечерва до Министерството за внатрешни работи (МВР) издаде наредба за објава на национална потерница и изјава за распишување на меѓународна потерница за двајцата осомничени во истрагата за проневера на Државна лотарија.
Оттаму информираат дека оваа наредба е издадена до МВР по донесените решенија на Кривичниот суд Скопје, со што е определен притвор за двајца осомничени во истрагата за случајот со Државна лотарија, а кои се недостапни на органите на прогонот.
Според процедурите на Обвинителството, прво се распишува национална потерница, а потоа се дава изјава за распишување на меѓународна потерница. Со таа изјава, се потврдува дека доколку осомничените бидат приведени во странство, ќе се бара нивна екстрадиција во земјава.
Кривичниот суд Скопје вечерва им одреди 30-дневен притвор на поранешниот вицепремиер Артан Груби и поранешниот директор на Државна лотарија, Перпарим Бајрами.
На другите четворица опфатени во истрагата, кои се осомничени за злоупотреба на службената положба и овластување, судија на претходна постапка на предлог на ОЈО Скопје им определи мерки за претпазливост, односно одземање на патна исправа и обврска за повремено јавување на службено лице во судот.
Инаку, Министерството за внатрешни работи (МВР) до ОЈО Скопје во случајот со Државна лотарија поднесе кривична пријава против осум лица за злоупотреба на службената положба и овластување, примање поткуп и за злоупотреба на постапката за јавен повик, доделување на договор за јавнa набавкa или јавно-приватно партнерство.
Според МВР, кривична пријава е поднеесена против П. Б. (31) за злоупотреба на службената положба и овластување, примање поткуп и злоупотреба на постапката за јавен повик, доделување на договор за јавна набавка или јавно-приватно партнерство; против А. Г. (47) од Скопје за злоупотреба на постапката за јавен повик, доделување на договор за јавнa набавкa или јавно-приватно партнерство; против Д. К. (50) од Скопје за злоупотреба на службената положба и овластување; против М. Д. (58) од Скопје за злоупотреба на службената положба и овластување; против В. П. (41) од Скопје за злоупотреба на службената положба и овластување и продолжено кривично дело примање поткуп; против А. А. (36) од Скопје за злоупотреба на службената положба и овластување и кривично дело примање поткуп и против М. З. (38) од Тетово за злоупотреба на службената положба и овластување.