Обвинетите, на возраст од 18 до 22 години, биле затекнати на приватна прослава на улицата „Васил Ѓоргов“, каде што имало и седум малолетници
Основното јавно обвинителство – Скопје поднесе предлог за издавање казнен налог против осум лица за кривично дело непостапување според здравствените прописи за време на епидемија, согласно со член 206 став 1 од Кривичниот законик.
Како што соопштија од Обвинителството, обвинетите, на возраст од 18 до 22 години, на 8 јануари биле затекнати на приватна прослава на улицата „Васил Ѓоргов“, во домот на една од обвинетите. На прославата биле затекнати и седум малолетни лица, за кои ќе се спроведе постапка согласно Законот за правда на децата.
Обвинетите, како што се наведува, постапиле спротивно на прописите и наредбите со кои се определуваат мерки за спречување на ширењето на опасна заразна болест, а кои се однесуваат на забрана за одржување прослави на отворен и затворен простор во периодот од 18.12.2020 до 21.1.2021 година.
Надлежниот јавен обвинител му предложил на Основниот кривичен суд – Скопје за обвинетите полнолетни лица да изрече парични казни од по 100 дневни глоби, со поединечна вредност на дневната глоба од 20 евра.