Додека двете најголеми политички партии се препукуваат околу тоа кој, што, дали и какви мерки треба да преземе за намалување на загадувањето, Скопје и натаму урива рекорди според индексот на загаденост. И денеска на порталот „Ај-кју ер“, Скопје се најде во првата десетка најзагадени светски градови
Двете најголеми политички партии и денеска не пропуштија да си разменат остри зборови околу загадувањето на воздухот. Владејачкиот СДСМ, кој е опозиција во Советот на Град Скопје, поднесе иницијатива за одржување вонредна седница, а од ВМРО-ДПМНЕ добија одговор дека ако СДСМ има чесна намера нека ја собере коалицијата со ДУИ и Левица и нека побара од Владата итни мерки.
Советничката група на СДСМ во Советот на Град Скопје денеска ја поднесе иницијативата за одржување вонредна седница на Советот за загадувањето на воздухот во главниот град. На иницијативата, освен потписи од советниците од СДСМ, има и од членовите во Советот од ЛДП и ДОМ.
Горан Шутаров, советник од СДСМ, на денешната прес-конференција ги повика сите советници, особено од ВМРО-ДПМНЕ како најмногубројна советничка група, да дадат поддршка на оваа иницијатива во интерес на скопјани.
„Претседателот на Советот, Трајко Славевски, да ја прифати иницијативата и да закаже седница што побрзо имајќи ја предвид итноста на ситуацијата. Советничката група на СДСМ има дополнителни предлог мерки кои ќе влијаат на намалување на загадувањето и кои треба што побрзо да се усвојат“,
рече Шутаров.
Тој како прв приоритет рече дека е итно зголемување на бројот на автобуси на сите линии во јавниот градски превоз, како и воведување бесплатен превоз за сите граѓани во Скопје.
„Итна пренамена на пари во Буџетот на Град Скопје, за зголемување на средствата за борба против загадувањето, финансиска помош за училиштата за адаптирање на системот за затоплување на еколошки енергенси, подготвување акциски план за чистење на сите депонии во Скопје, чистење на улиците и јавните површини со помош на цистерни, безусловно интензивно постапување на инспекторите во вршењето на својата должност“,
се мерките кои Шутаров ги претстави, а кои ќе бараат да бидат усвоени на вонредната седница со цел да се придонесе кон намалување на загаденоста на воздухот.
Според него ВМРО-ДПМНЕ наместо да тера инает, да се приклучи на оваа иницијатива, бидејќи како што рече, ова не е време за политика туку за дејствување затоа што мерките против загадувањето на воздухот се од значење за сите граѓани на Скопје, додаде Шутаров.
По прес-конференцијата на Шутаров, преку писмено соопштение реагираа од ВМРО-ДПМНЕ. Оттаму велат дека мерките на СДСМ за почист воздух се чист популизам кој нема да смени ништо, само ќе го наполни буџетот на сдсмовскиот директор на ЈСП.
„Шутаров овие барања со кои трет ден парадира СДС требаше да му ги пренесат на Ковачевски кој како тема можеше да ги отвори на една од тајните средби со Арсовска каде наместо тендери во 4 очи можат да прифатат пакет мерки за почист воздух. СДС е 7 години на централна власт, а полумерките на советникот Шутаров нема да сменат ништо и се чист популизам. Наместо да го местат да чита проза и поезија потребни се суштински мерки за почист воздух кои не може да се имплементираат без владата“,
се вели во соопштението од ВМРО-ДПМНЕ.
Според нив никој во Скопје не верува дека почист воздух ќе има ако се обезбеди бесплатен превоз во ЈСП, или еднократно се доделат пари под ставката животна средина.
„Со ваквите полумерки само СДС и Шутаров отвораат пат за нови субвенции кои Градот треба да ги додели на директорот на ЈСП кој доаѓа директно од штабот на СДС. Впрочем мерките се да се наполни буџетот на сдсовскиот директор за да може Арсовска и Ковачевски да прават нови тендери во 4 очи како оној што ЈСП го направи со ‘Пуцко Петрол’ кој припаѓа на пратеник од власта. Ако Шутаров од СДС има чесна намера нека ја собере коалицијата ДУИ, Левица, СДС и нека побараат од владата итни мерки“,
додаваат од ВМРО-ДПМНЕ.
Преписката продолжи со нова писмена реакција од СДСМ во која се вели дека одбивањето на ВМРО-ДПМНЕ на мерките против загадениот воздух, како и иницијативата за вонредна седница на Советот за загадувањето во Скопје е уште еден показател за неодговорноста на партијата предводена од Христијан Мицкоски.
„ВМРО-ДПМНЕ ја интересира само за тендери и провизии за богатење на одредени поединци, но и не и граѓаните. За жал, сите граѓани ја плаќаат цената од неодговорниот однос на коалицијата ВМРО-ДПМНЕ – Арсовска – Левица“,
нагласуваат од СДСМ.
А, додека двете најголеми политички партии се препукуваат околу тоа кој, што, дали и какви мерки да преземе за намалување на загадувањето, Скопје и натаму урива рекорди со индексот на загаденост. И денеска на порталот „Ај-кју ер“ Скопје се најде во првата десетка најзагадени светски градови. И на домашниот страна за квалитет на воздухот на Министерството за животна средина и просторно планирање може да се забележи дека мерните станици во речиси сите делови од Скопје покажуваат високи концентрации на ПМ 2.5 честичките кои се особено опасни за здравјето на луѓето.