Скопјани ќе имаат парно од 15 октомври – ЕСМ и „Адора“ се договорија за закуп на топланите

„Договорот за закуп е со трајност за времетраење на грејната сезона 2022/2023 година. Закупнината е дефинирана според постоечката цена утврдена од Регулаторната комисија за енергетика и водни услуги (РКЕ)“, соопшти попладнево ЕСМ

„Адора инженеринг“ и АД Електрани на Северна Македонија (ЕСМ) постигнаа договор за закуп на топланите „Исток“ и „Запад“. Топланите кои се во сопственост на „Адора“ ќе се користат од страна на ЕСМ во процесот на обезбедување греење за градот Скопје во претстојната грејна сезона која започнува на 15 октомври.

„Договорот за закуп е со трајност за времетраење на грејната сезона 2022/2023 година. Закупнината е дефинирана според постоечката цена утврдена од Регулаторната комисија за енергетика и водни услуги (РКЕ)“,

соопшти попладнево ЕСМ.

Во соопштението се додава дека двете компании покажале општествена одговорност и свесност во однос на потребите на граѓаните на Скопје.

„Постигнат договор за сите прашања кои претставуваа предмет на дискусија да се апсолвираат во следниот период“,

додаваат од компанијата.

„Адора“ е подготвена за договор со ЕСМ доколку се изнајде модел за подмирување на нивните побарувања

Претходно, од „Адора“ посочија дека доколку се постигне решение со ЕСМ, иако на нивна финансиска штета од 550 илјади евра, подготвени се да пријдат кон краткорочен договор за закуп со АД ЕСМ до моментот на реализирање на сите потребни услови за купопродажба.