Тој информира и дека два онколошки лека се префрлени од болничка во примарна позитивна листа и оти тоа се лекови што досега се издавале во Клиниката за онкологија и радиотерапија, а отсега тоа ќе биде во аптеките, со рецепти
Фондот за здравствено осигурување (ФЗОМ) уверува дека скапата биолошка терапија е достапна на Клиниката за онкологија, а за двата генерички лека кои моментално ги нема кај дистрибутерите, обезбедена е соодветна замена. Ова го изјави денеска директорот на ФЗОМ, Сашо Клековски, појаснувајќи дека недостигот на споменатите два генерички лека не е резултат на ненавремена набавка, туку на нивна моментална недостапност кај дистрибутерите.
Едниот лек, како што рече Клековски, е за широка употреба за повеќе видови рак, додека другиот е наменет за пациенти со рак на белите дробови. Тие не се биолошки, ниту, пак, се скапи, а ги произведуваат повеќе производители. Директорот вели дека се очекува наскоро да пристигнат, а оти во меѓувреме, Клиниката за онкологија располага со други лекови како замена, вклучувајќи и нова генерација од истиот производител.
„Ниеден од скапите биолошки лекови во моментов не недостасува“,
рече Клековски апелирајќи до медиумите и политичарите да не создаваат притисок и несигурност кај пациентите со вести за наводен недостаток на лекови.
Тој потенцира дека во моментов, и во иднина, не смее да има недостиг од лекови.
Директорот на ФЗОМ информира дека комисијата за позитивна листа на лекови е активна и работи на анализи за нејзино проширување. Одлука за тоа се очекува многу брзо, уште во текот на летото.
Тој додаде и дека два онколошки лека се префрлени од болничка во примарна позитивна листа.
„На позитивна А-листа се вклучуваат два лека ароматаза инхибитори (letrozole, anastrazole). Овие два лека се употребуваат во третман на рак на дојка и ги употребуваат околу 2 500 лица. Двата лека досега се издаваа во Клиниката за онкологија и радиотерапија, отсега тоа ќе биде во аптеките, со рецепт. Промената е на барање и на пациентите и на Клиниката, за да се намали товарот на пациентите и на клиниката“,
рече Клековски.
Тој објасни дека пациентите досега морале да доаѓаат во клиниката во Скопје да го подигнат лекот и оти само процесот во клиниката одземал 2-3 часа.
„Од друга страна во клиниката тоа генерира пример во 2023 година 11 437 прегледи и тесни грла на најмалку пет точки. Шалтер за проверка на упат и осигурување, амбуланта за препис на терапија, шалтер за креирање на документација за ФЗОМ, шалтер за издавање на терапија (дневна болница за таблетарна терапија), клиничка болничка аптека за подигање и евиденција на лекот“,
рече Клековски.
Вчера и од Клиниката за онкологија рекоа дека за лековите што поради застој во дистрибуцијата треба деновиве да пристигнат на Клиниката, има соодветна замена со идентична ефикаснот. Реакцијата од Онкологија следуваше откако претходно 64-годишна жена што се лекува од рак на белите дробови излезе со наводи дека на Клиниката нема терапија за лекување на болните од рак.
Таа посочи дека од препишаните четири хемотерапии, една примила на 28 мај, но кога требало да ја прими втората, закажана за 18 јуни, за неа немало терапија, со образложение дека сè уште не пристигнале набавените лекови за нејзиниот тип канцер.
Од Клиниката рекоа дека сите пациенти што се лекуваат кај нив, ја добиваат потребната терапија, како и дека се достапни лековите за третман на онколошки заболувања.