Тетовскиот ковид-центар, според известувањето од МЗ, е проектиран со три влеза, ходниците се широки 2,4 метри а парапетите на прозорците се ниски во случај на евакуација
Сите 19 модуларни ковид-болници во државата се типски објекти, градени по највисоки медицински и безбедносни стандарди. Модуларните ковид-центри, вклучувајќи ја и болницата во Тетово, се отворени после технички прием, соопшти Министерството за здравство.
„При градбата на сите модуларни болници, вградените материјали се сертифицирани. Ковид-центарот во Тетово е проектиран со три влеза, ходниците се широки 2,4 метри а парапетите на прозорците се ниски во случај на евакуација. Во објектот не е користено дрво и запазени се сите други потребни елементи за заштита. При пуштање во употреба, направен е уреден технички прием. При градбата има уредно документирани записници за незначителни технички забелешки – силиконирање лајсни на подот, нивелирање на сифон во тоалет, продолжување на дел од олуците и сл. По овие барања, е постапено и тие се санирани пред пуштање во употреба и хоспитализација на пациенти. Овие документи ќе бидат доставени на увид на јавноста и медиумите уште денеска“,
информираат од Министерството.
Ковид-центарот во Тетово, како што се истакнува, ги поседува и сите потребни сертификати за заштита при несреќи.
Од Министерството апелираат да не се шпекулира со ваквите информации и очекуваат експертите и истражните органи што побрзо да го истражат случајот за оваа стравотна несреќа.
„Сите аспекти на случајот да бидат предмет на темелна и брза истрага и, секако, одговорност доколку истрагата го покаже тоа. Самите модуларни ковид-центри беа и сè уште се клучни во справување со пандемијата и хоспитализацијата на пациенти. Тие се градени по највисоки стандарди, а набавката што Министерството за здравство ја правеше е согласно стандардите за ваквите болници кои се користат во многу земји во светот“,
се наведува во соопштението.