Доколку не донесат одлука за субвенционирање на ЈСП до недела, 21 јануари 2024 година, во понеделник, вработените во базите и другите сектори нема да работат бидејќи во законски рок не е исплатена изработената декемвриска плата
Арсовска вели дека сè што како градоначалник можела да направи било преземно и додаде дека понатаму одговорноста е во Советот
Репрезентативните синдикати во ЈСП „Скопје“ најавуваат дека од понеделник вработените во базите и другите сектори нема да работат бидејќи во законски рок не е исплатена изработената декемвриска плата.
Од репрезентативните синдикати повикуваат итно да биде свикана седница на Град Скопје на која советниците ќе гласаат за субвенционирање на ЈСП „Скопје“.
„Репрезентативните синдикати во Јавното сообраќајно претпријатие ’Скопје’ ги повикуваат советниците од Советот на Град Скопје итно да свикаат седница на Советот со една единствена точка на дневен ред, а тоа е гласање за субвенционирање на ЈСП. Бидејќи истите тие советници го изгласаа буџетот на градот Скопје за 2024 година. Тоа значи, доколку не донесат одлука до недела, 21 јануари 2024 година, во понеделник, вработените во базите и другите сектори, нема да работат, бидејќи не е исплатена во законски рок изработената декемвриска плата“,
велат од синдикатите.
Оттаму додаваат дека законскиот рок за исплата на декемвриската плата е 15 јануари, а следната редовна седница на Советот на Град Скопје е закажана за 31 јануари.
Според градоначалничката Данела Арсовска, ЈСП „Скопје“ функционира тековно. Таа денеска одговарајќи на новинарски прашања рече дека сите одлуки што се однесувале на редовното функционирање, поврзани со буџетот на Град Скопје, биле доставени до Советот.
„Јас како градоначалник, оние одлуки кои беа за редовното функционирање и поврзани со буџетот на Град Скопје уредно ги доставив до Советот и до претседателот. Дури свикав и една итна седница, којашто тој одлучи, со свое дискреционо право, точките коишто беа од важност за најважните јавни претпријатија на градот Скопје да ги отстрани од дневниот ред. Како што можете да видите, побаравме да биде свикана нова вонредна седница затоа што овие точки беа отстранети, но истата, до овој ден, сè уште не е свикана“,
одговори Арсовска.
Арсовска вели дека сè што како градоначалник можела да направи било преземно и додаде дека понатаму одговорноста е во Советот.
„Се надевам дека прво одговорно си ја имаат разбрано функцијата којашто ја имаат, а доколку сакаат свесно да ги ништат претпријатијата, одговорноста е нивна. Ние сè што сме можеле сме направиле. Апелирам на свесност, на совесност бидејќи на овие луѓе таму им зависи егзистенцијата, меѓутоа исто така и целосното функционирање на Град Скопје. Видовте дека со политика и со политикантство на грбот на сите граѓани сакаа да тераат нешто што резултираше со голем револт со делот на јавниот превоз во изминатите две години. Се надевам дека нема да продолжат на тој неодговорен начин“,
рече таа.
Арсовска додаде дека одговорноста е кај Советот и за тоа што 12 месеци не се носи одлука да имаат граѓаните нови и еколошки автобуси кои нема да загадуваат.
„Одлуката за овие работи кои се неопходни за функционирање на градот се пред нив и би требало да знаат дека имаат одговорност ако не ги донесат, а ќе ги повикувам на одговорност секој еден ден“,
додаде Арсовска.