Директорите не смеат да се избираат според политичка или етничка припадност, туку според стручност, визија и докажана посветеност, велат од Синдикатот на културата
Културата не е квота, директорите не смеат да се избират според политичка или етничка припадност, туку според стручност, визија и докажана посветеност, велат од Синдикатот на културата (СКРМ). Во објавата од СКРМ се наведува дека уште во март испратиле допис до министерот за култура и туризам Зоран Љутков, од кого бараат при изборот на директори на националните институции да не се отстапува од мерит-системот и да се избере најквалификуваниот од сите пријавени кандидати. Реакцијата следува по изборот на Али Синани за директор на Националната галерија.
„Министерството за култура и министерот очигледно продолжуваат да го поткопуваат професионалниот интегритет на културните работници, потценувајќи ги нивните стручни и интелектуални капацитети. Се назначуваат кандидати без соодветно работно искуство, па дури и лица кои не ги исполнуваат основните услови за да бидат на раководна позиција. Ако министерот навистина се залага за силни културни институции како темел на културниот развој на државата, тогаш мора да разбере дека директорите не смеат да се избираат според политичка или етничка припадност, туку според стручност, визија и докажана посветеност“,
велат од Синдикатот на културата.
За изборот на Синани вчера реагираа и вработените во Националната галерија кои побараа поништување и преиспитување на одлуката за избор на директор. Во писмениот допис до јавноста наведуваат дека Синани го нема потребното искуство со музејска дејност, бидејќи по професија е ликовен уметник.
„Со овој избор се загрозува принципот на стручност и објективна проценка, кои се клучни за одговорно раководење со институцијата од национално значење. Наместо транспарентен избор со јасни критериуми, институцијата е доведена во ризик да биде водена од лице без потребно основно познавање на музејската дејност, но и заштитата и конзервацијата кои се составен дел во негувањето и грижата за колекцијата од над 3.300 уметнички дела – движно културно наследство (слики, скулптури, цртежи, графики, икони, етнолошки, библиотечен материјал и др.) и поседува 4 објекти (Даут-пашин амам, Чифте амам и Спомен куќата на Лазар Личеноски – кои се недвижно културно наследство и Мултимедијалниот центар Мала станица“,
се наведува во реакцијата од вработените во Националната галерија.
Синани доаѓа на местото на досегашната в. д. директорка Маја Неделковска-Брзанова, а како што соопштија од Националната галерија тој бил избран на 9 јули.
„По огласот за директор кој беше распишан пред скоро три месеци, за директор на Националната галерија на РС Македонија, со мандат од четири години, на 9 јули 2025 година е избран и именуван д-р Али Синани, за директор на Институцијата“,
се наведува во објавата на Националната галерија.
Синани е роден во 1977 во Гостивар, а изминативе 25 години живее и работи во Швајцарија. Дипломирал на Факултетот за ликовни уметности во Скопје во 2002 година, педагошки оддел, сликарска насока во класата на проф. Рубенс Корубин. Магистерските студии ги завршил на истиот факултет во 2009, во класата на д-р Антони Мазневски. Од 2000 живее и работи во Швајцарија, каде што држи предавања во своето „Студио Арте“ во Сент Гален. Од 2012 продолжил со докторат во Нови Пазар – Србија. Во 2018 ја претставувал Швајцарија на меѓународната изложба „Сон и реалност“ во Лувр во Париз.