Според него, нашата надворешна политика има три константи, како нашето полноправно членство во НАТО, како кредибилен сојузник на Алијансата, нашата целосна усогласеност со заедничката надворешна и безбедносна политика на Европската Унија и нашето стратешко партнерство со Соединетите Американски Држави (САД)
Силата на солидарноста е главната карактеристика на НАТО-сојузот, а која од срце беше демонстрирана при дадената и понудена помош во трагичната несреќа во Кочани, во која загинаа 59 лица, а повеќе од 100 се повредени. Ова денеска го рече министерот за надворешни работи и надворешна политика Тимчо Муцунски во обраќањето по повод петгодишнината од членството на државата во НАТО, на работната средба со амбасадорите на земјите членки и партнери на Алијансата.
„Вашиот брз одговор ја покажа силата на солидарноста, која е главна карактеристика на нашиот сојуз, а која во овој случај беше демонстрирана од срце. Овој случај уште еднаш ја покажа важноста на солидарноста која треба целосно и заеднички да ја негуваме како наш главен столб во нашите однос. Ви благодариме уште еднаш за сета поддршка и изразите на сочувство за еден од најтешките моменти за нашата земја“,
рече тој.
Посочи дека како Влада веќе ги преземаат сите неопходни мерки за целосно истражување на случајот, вклучително и изнесување на сите инволвирани лица кои придонеле да се случи ваквата трагедија, пред судските органи.
„Определени сме одлучно да се бориме со корупцијата и сите девијантни појави чија цел е да го ослабат и нарушат нашиот систем. Тоа нема да го дозволиме. Наша цел е да ги зајакнеме довербата и да ја унапредиме функционалноста на системот во кој граѓаните ќе имаат целосна доверба“,
кажа министерот.
Според него, нашата надворешна политика има три константи, како нашето полноправно членство во НАТО, како кредибилен сојузник на Алијансата, нашата целосна усогласеност со заедничката надворешна и безбедносна политика на Европската Унија и нашето стратешко партнерство со Соединетите Американски Држави (САД).
„Сите целосно кореспондираат со нашиот национален интерес и сите одлуки што ги носиме се вклопени во таа рамка и се усогласени со тие интереси“,
вели Муцунски.
Посочи дека силите на нашата Армија се во состав на воспоставување команди на НАТО во Бугарија, Романија и Латвија. Регионално имаме зајакнато присуство со наши сили во силите на Косово и во Мисијата на ЕУ во Босна и Херцеговина.
Продолжуваме, како што додаде, да издвојуваме најмалку два отсто од БДП за одбраната.
Република Северна Македонија денеска одбележува пет години од влезот во Северноатлантската алијанса – НАТО, што беше еден од најзначајните надворешнополитички приоритети на државата по независноста.
На 27 март 2020 година, земјата стана 30. членка на најголемиот воено-политички сојуз во светот.