На новинарско прашање дали очекува ако продолжи со праксата со употребата на името на државата, да дојде до блокада од Грција и повлекување на поддршката за приклучување во ЕУ, Сиљановска-Давкова рече дека не смета дека го крши Уставот, како и дека, според неа, неупотребувањето на уставното име може да предивика проблеми
Со грчкиот министер за надворешни работи Јоргос Герапетритис седевме еден до друг на денешниот Самит на земјите вклучени во Процесот за соработка во Југоситочна Европа (ПСЈИЕ). Ова попладнево на заедничка прес-конференција со нејзните колеги од Црна Гора Јаков Милатовиќ и од Албанија Бајрам Бегај, го изјави претседателката Гордана Сиљановска-Давкова, одговарајќи на новинарско прашање дали темата околу употребата на уставното име била отворена со грчкиот министер Герапетритис. Претседателката посочи дека таа тема не била отворена.
„Не беше отворена темата. Седевме ееден до друг. Многу сум задоволна што дојде. Оставивме простор, бидејќи му доцнеше летот, да се обрати како последен“,
рече претседателката.
Според неа, пораките на Герапетритис биле регионално обоени, како што рече, дека треба да си помагаме, да градиме владеење на правото, да го почитуваме меѓународното право, дека треба да продолжиме таму каде имаше јасни определби на Солунскиот самит.
„Тоа беа разговорите. Мислам дека атмосферата беше пријатна, пријателска, беше и заменик-министерката за надворешни работи, со која се познаваме. Мислам дека луѓето од Балканот, кога е потребно, умееме да се разбереме. Многу сум задоволна, особено поради целосно усогласената декларација која беше усвоена“,
вели Сиљановска-Давкова.
На новинарско прашање дали очекува ако продолжи со праксата со употребата на името на државата, да дојде до блокада од Грција и повлекување на поддршката за приклучување во ЕУ, Сиљановска-Давкова рече дека не смета дека го крши Уставот, како и дека, според неа, неупотребувањето на уставното име може да предивика проблеми.
„Да потсетам, и моите документи, и тие што ги потпишувам и тие што ги поседувам, пасош, лична карта, сите документи кои излегуваат од кабинетот се со уставното име. Тоа е во рамки на меѓународното право и во рамките на Уставот. Точно е дека секоја изјава на луѓето од политиката, од оние кои се на функции се толкува како да е официјален чин, ама секој од нас има, јин јанг со две лица, едно официјално и едно друго. Јас како човек имам право, повторувам од Сократ до денеска, во рамките на слободата на мислата и слободното изразување на мислата, да се изразувам така како што тоа го правам. И не мислам дека тоа е кршење ниту на Уставот, ниту на меѓународното право“,
рече претседателката.
На завршната прес-конференција рече дека сме свесни дека постои замор од проширувањето во ЕУ, но дека, како што посочи, постои уште поголем замор со чекањето.
„Затоа во својство на претседавачи на ПСЈИЕ ги охрабрувам европските партнери да останат доследни, кредибилни и принципиелни кон европската идеја. Не е доволно да велите дека ЕУ е недовршена приказна и недовршена симфонија без Западниот Балкан, туку треба во оркестарот да го вклучите и Западниот Балкан, треба и тој ноти да пишува и да учествува во европските работи“,
вели таа.
Денешниот состанок таа го оцени како мошне позитивен и им се заблагодари на поранешниот претседател Стево Пендаровски и на министерот за надворешни работи Бујар Османи, кои беа вклучени во овој процес.
Од 1 јули Албанија го презема претседавањето со ПСЈИЕ. Албанскиот претседател Барјам Бегај истакна дека неговата земја останува проактивен поддржувач на регионалната соработка.и дека тие ќе се фокусираат на прашања поврзани со ЕУ, економска стабилност, зелена и дигитална агенда, култура, туризам и поврзување.