Во присуство на лекар Македонец, ми беше овозможен разговор со најблиските роднини на македонските пациенти. Сите имаа пофални зборови за болничкиот персонал. Манифестираа радост за видно подобрената состојба на нивните најмили“, се вели во соопштението по посетата на претседателката на болницата „Пирогов“
Претседателката Гордана Сиљановска-Давкова денеска ги посети повредените од пожарот во Кочани што се лекуваат во болницата „Пирогов“ во Софија.
На нејзиниот фејсбук-профил објави дека за здравствената состојба на пациентите се информирала од бугарскиот министер за здравство Силви Кирилов, од заменик-директорот на болницата „Пирогов“, Николај Габровски и од раководителката на Одделот за изгореници и пластична хирургија, Маја Аргирова.
„Ми пренесоа дека состојбата на осумтемината мекедонски пациенти е стабилна, како и дека процесот на нивно закрепнување бележи напредок. Во присуство на лекар Македонец, ми беше овозможен разговор со најблиските роднини на македонските пациенти. Сите имаа пофални зборови за болничкиот персонал. Манифестираа радост за видно подобрената состојба на нивните најмили“,
се вели во соопштението.
Претседателката се заблагодари на бугарските меедицински тимови што учествуваа во укажувањето на итната медицинска помош, како и на бугарското Министерство за здравство за координираната и стручно водена интервенција.
„Овие вредности, според неа, ќе останат темел на заемна почит и искрено пријателство меѓу двата блиски народа, бугарскиот и македонскиот“,
пишува на фејсбук-профилот на Сиљановска-Давкова.
Во Бугарија вкупно се наоѓаат 14 пациенти, од кои девет се во болницата „Пирогов“.
Сите се екстубирани и оперирани, а кај некои е извршена и трансплантација на кожа. Една пациентка се лекува амбулантски со преврски.
Тројца се хоспитализирани во Военомедицинскиот центар во Варна во добра општа состојба и во болницата „Св Ѓорѓи“ во Пловдив е хоспитализиран еден пациент.