Поранешниот помошник-министер во МВР издржуваше повеќегодишна казна затвор за случаите „Тенк“ и „300“, кои беа отворени од поранешното Специјално јавно обвинителство (СЈО)
Осум лица, од кои половината целосно, а останатите четворица делумно, се ослободуваат од издржување на затворските казни со одлука за помилување на претседателката на државата, Гордана Сиљановска-Давкова, објавена вчера (2 април) во „Службен весник“.
Меѓу осудените лица кои делумно се ослободуваат од натамошно издржување на неиздржаниот дел од затворската казна е и поранешниот помошник-министер во Министерството за внатрешни работи (МВР), Ѓоко Поповски.
Тој издржуваше повеќегодишна казна затвор за случаите „Тенк“ и „300“, кои беа отворени од поранешното Специјално јавно обвинителство (СЈО).
За набавката на 300 возила за потребите на МВР, Поповски во мај беше првостепено осуден на деветгодишна затворска казна, која во декември истата година Апелацискиот суд ја укина и предметот го врати на повторно судење.
И во повторената постапка во Основниот кривичен суд Скопје, во октомври 2019 година Поповски повторно беше осуден на девет години затвор, но при жалбената постапка, Апелација овојпат ја потврди првостепената пресуда, но му ја намали казната на пет години затвор.
Поповски од згаснатото Специјално јавно обвинителство беше обвинет дека во периодот од 2008 до 2012 година ја злоупотребил службената положба и овластување не почитувајќи ги законските прописи за јавни набавки при избор на најповолен понудувач и го оштетил буџетот за 453 570 евра.
Во врска со случајот „Тенк“, за набавката на „мерцедесот“ од 600 000 евра, Поповски беше осуден на затворска казна од четири години и шест месеци, а за истиот истиот случај две години затвор доби експремиерот Никола Груевски и поранешната министерка за внатрешни работи Гордана Јанкулоска.
На Груевски лани во октомври му застаре делото поради кое побегна во Унгарија, а Јанкулоска на 1 ноември 2023 година доби условен отпуст, откако Апелацискиот суд ѝ го уважи барањето.
Поповски, како што пишува МИА, побара спојување и ублажување на казните за двата случаи, по што му е одредена заедничка казна затвор од осум години и два месеци, што Апелација потоа ја намалува на седум години затвор.
Според одлуката за помилување на претседателката Гордана Сиљановска-Давкова, нему казната делумно му се намалува во траење од една година.
Александар Василев од Росоман, Марина Трајковска и селото Долно Караслари и Аурон Емруш Лимани од Прешево се останатите тројца кои добија делумно помилување од претседателката на државата.
Од понатамошно извршување на неиздржаниот дел на затворските казни, како што стои во објавената одлука во „Службен весник“, потполно се ослободуваат Сенат Фејзули од Кондово, Глигор Николов од Кавадарци, Сали Узеири од село Долно Палчиште и Сабахудин Мујановиќ од селото Долно Коњари.
