Во својот говор на отворањето на Светската конференција за вештачка интелигенција во Шангај, тој ја претставил кинеската коалиција за вештачка интелигенција како ривал на меѓународната иницијатива Pax Silica предводена од САД за обезбедување глобални синџири на снабдување со ваква технологија и критични минерали
Кинескиот претседател Си Ѓинпинг во петокот на отворањето на најголемата технолошка конференција во земјата го претставил Пекинг како лидер на новиот глобален поредок за вештачка интелигенција, истовремено промовирајќи ја технологијата со отворен код и оспорувајќи го влијанието на Соединетите Американски Држави (САД) врз правилата што го регулираат овој високотехнолошки сектор, пренесе Ројтерс.
Во своето обраќање на отворањето на Светската конференција за вештачка интелигенција (WAIC) во Шангај, кинескиот претседател ги повикал земјите да ја искористат, како што пренесува новинската агенција, ретката и историска можност што ја нуди вештачката интелигенција со отворен код. Во таа насока, тој упатил ветување до до земјите во развој дека Пекинг ќе им помогне да изградат капацитет за вештачка интелигенција, наведувајќи дека постои опасност од нови историски неправди поради нееднаков пристап до технологијата.
Забелешките на Си Ѓинпинг, според Ројтерс, досега се негова најјасна артикулација за амбицијата на Кина да го обликува глобалното управување со вештачката интелигенција, врамувајќи ги своите модели со отворен код како глобално јавно добро и позиционирајќи го Пекинг како главен конкурент на Вашингтон во трката за технолошко лидерство.
Споредувајќи ја важноста на вештачката интелигенција со пронаоѓањето на парната машина и електричната енергија, Си Ѓинпинг ја изложил визија во која Кина ја споделува технологијата и експертизата за вештачка интелигенција со земјите од глобалниот југ, додека истовремено прави напори за создавање стандарди што ја регулираат новата технологија.
Во говорот, тој ја претставил кинеската коалиција за вештачка интелигенција како ривал на меѓународната иницијатива Pax Silica предводена од САД за обезбедување глобални синџири на снабдување со ваква технологија и критични минерали. Притоа кинескиот претседател избегнал директно да го спомене Вашингтон во контекстот во кој ги изнел овие свои забелешки.
Неговите коментари доаѓаат во време кога кинеските модели на вештачка интелигенција со отворен код брзо напредуваат во однос на системите во сопственост на американските компании, како што се „Опен еј-ај“ (Open AI) и „Антропик“ (Anthropic).
Имено, стартапот „Муншот еј-ај“ (Moonshot AI), со седиште во Пекинг, денеска го претстави „Кими К3“ (Kimi K3), опишувајќи го како најголемиот модел на вештачка интелигенција со отворен код во светот, според бројот на параметри. Ова доаѓа еден месец откако владата на Соединетите Американски Држави нагло ги повлече моделите на вештачка интелигенција од класата на „Антропик“ поради безбедносни проблеми.
Кинескиот претседател Си Ѓинпинг во своето обраќање, исто така повикал системите за вештачка интелигенција да останат под човечка контрола, упатувајќи, во таа насока, повик до земјите да воспостават механизми за рано предупредување и итен одговор во случај на ризици од вештачката интелигенција. Ова, како што се наведува, се досега најјасните коментари на Си Ѓинпинг во однос на безбедноста и можните ризици од вештачката интелигенција.
Тој дополнително повикал на заштитни мерки против сценарија за евентуално губење контрола врз системите за вештачка интелигенција, предупредувајќи на опасностите што би можеле да дојдат од автономните системи доколку му побегнат на човечкиот надзор и контрола.
Си Ѓинпинг рекол и дека Светската организација за соработка во вештачката интелигенција (WAICO), основана од Кина, на која во четвртокот ѝ се придружија 29 земји членки, означува пресвртница во историјата на глобалниот развој на вештачката интелигенција, со тоа што може да одговори на барањата на земјите во развој за поголемо учество во управувањето со вештачката интелигенција.
Во таа насока, Кина се обврзува да обезбеди обука за вештачка интелигенција и да развие центри за соработка со земјите од БРИКС, АСЕАН, Латиноамериканската унија и Африканската унија, рекол Си Ѓинпинг, истакнувајќи ги иницијативите на Кина за дипломатија преку вештачка интелигенција со големите блокови од глобалниот југ каде што Пекинг веќе има огромно влијание.
„Пораката на Си е јасна. Кина нема да следи никого ниту во технологијата ниту во стандардите за вештачка интелигенција. Наместо тоа, Кина ќе го води светот во обете.“,
рекол Џорџ Чен, претседател за дигитална пракса во консултантската компанија „Азија груп“ (The Asia Group)
Чен додал дека пораката на кинескиот претседател е изјава, но може да се смета и како предупредување.
„Кина нема да дозволи никому да ѝ кажува што да прави со вештачката интелигенција“,
додал тој.
Собирот кој се одржува од 17 до 20 јули доаѓа во време кога Вашингтон и Пекинг се подготвуваат за нивните први разговори на владино ниво за вештачката интелигенција под водство на американскиот претседател Доналд Трамп.
Двете светски сили презентираа спротивставени визии на дијалогот на Обединетите нации за вештачката интелигенција минатата недела, каде што американските претставници тврдеа дека прекумерната регулатива може да ги попречи иновациите, додека Кина ги промовираше своите нискобуџетни модели со отворен код како алатка за намалување на глобалниот јаз во пристапот до вештачката интелигенција.
Заедно со водечките кинески технолошки компании, на Светската конференција во Шангај (WAIC) присуствуваат генералниот секретар на ОН, Антонио Гутереш, казахстанскиот претседател Касим-Џомарт Токаев и тајландскиот премиер Анутин Чарнвиракул.