Откако тоа го сторија фризерите, оправдувајќи ја дополнителната давачка поради зголемените трошоци за дополнителната дезинфекција, на истиот чекор се решија и стоматолозите
Сѐ повеќе стоматолошки ординации во Швајцарија наплаќаат специјална „корона-такса“, што наиде на остри критики од Здружението за заштита на потрошувачите.
Претходно, фризерите воведоа специјални такси оправдувајќи ги со трошоците за дополнителна дезинфекција.
Сега, стоматолозите, исто така, се одлучија да го преземат овој чекор наплаќајќи им на пациентите такса за дезинфекција на работното место. Во Цирих таа такса изнесува 15,30 франци.
Надлежните власти објаснуваат дека таксата за дезинфекција на работното место не е ништо ново, туку дека од јануари таа е составен дел на стоматолошката тарифа. Сепак, досега повеќето стоматолози не ја користеа оваа опција.
Сега, според Здружението на стоматолози, поради коронавирусот, стоматолозите имаат поголеми трошоци за дезинфекција на своите ординации, а поради задолжителното проветрување, тие имаат подолги паузи помеѓу приемот на пациенти.