Инвестициската платформа е креирана врз основа на Долгорочната стратегија за климатска акција во правец на спроведување на амбициозните политики и за намалување на нето-емисиите на стакленички гасови за 82 отсто до 2030 година во споредба со нивоата од 1990 година
Македонија се потпира на јаглен за 40 отсто од своето производство на електрична енергија. Платформата ќе го поддржи отфрлањето на јагленот во земјата до 2030 година, распоредувањето на обновливата енергија и поврзаните инвестиции во мрежата.
Ова денеска во рамките на Климатскиот самит КОП 28 во Дубаи го истакна министерката за животна средина и просторно планирање, Каја Шукова.
„Со потпишувањето на платформата го таргетираме најзначајниот извор на емисија на стакленички гасови во земјата, но исто така го таргетираме и секторот со најдобро социјално влијание. Нашите очекувања од платформата се поврзани со пополнување на инвестициската празнина потребна за спроведување на сценариото за ублажување, што покажува дека само преку партнерства помеѓу различни чинители (влади, банки, приватни инвеститори) е можна праведна енергетска транзиција“,
истакна Шукова во своето излагање.
Таа додаде дека имаме развиен патоказ и планови за имплементација на нашите националано определени придонеси кон договорот од Париз.
„Знаеме колку ќе чини и од каде може да се распределат инвестициите, дека имаме јасно изразена политичка определба докажана со неколку усвоени документи за транзиција на зелена енергија, кои им дадоа сигурност на инвеститорите, а паралелно, како Влада работиме на олеснување на трансферот на технологии за чиста енергија во земјата преку поставување на соодветна регулаторна рамка. Поттикнувањето на соработката со меѓународните организации, соседните земји и глобалните иницијативи за споделување на најдобрите практики, искуства и ресурси се исто така од големо значење“,
потенцира таа.
Инвестициската платформа е креирана врз основа на Долгорочната стратегија за климатска акција во насока на спроведување на амбициозните политики и средночните (намалување на нето-емисиите на стакленички гасови за 82 отсто до 2030 г. во споредба со нивоата од 1990 година) и долгорочните климатски цели и претставува основа за мобилизирање на потребните средства, истовремено обезбедувајќи правична зелена транзиција која ги штити ранливите заедници.
Во рамките КОП 28, денеска, министерката за животна средина и просторно планирање Каја Шукова и министерот за економија Крешник Бектеши беа дел од настанот на кој се презентираше инвестициска платформа за праведната енергетска транзиција на Македонија и беше потпишан договор за партнерство со Европската банка за обнова и развој, Светската инвестициска банка, Европската банка за развој, Германската развоја банка, Климатскиот инвестициски фонд и други меѓународни финансиски институции како дел од Партнерството за НДЦ посветено на амбициозно спроведување на национално определени придонеси според Договорот од Париз и Целите за одржлив развој до 2030 година.
На настанот се разменија мислења за тоа како пристапите засновани на платформи во земјата можат да помогнат да се забрза декарбонизацијата и мерките за адаптација и отпорност и како можат мултилатералните развојни банки и другите засегнати страни да ги поддржат овие процеси преку координирани мерки за политички дијалог, инвестиции и финансиска помош и градење на капацитети.
На настанот се обратија Фатих Бирол, извршен дирекотр на Меѓународната агенција за енергија; д-р Ранија А. Ал Машат, министер за меѓународна соработка Египет; Џин Линкун, претседател на Азиската инфраструктурна инвестициска банка и Одил Рено Басо, претседател на Европската банка за обнова и развој.