Иако се споменуваа имињата на можните замени за Пригожин кои би наишле на одобрение од Кремљ, не е сигурно дали некое од нив ќе може да го замени
По маршот на Евгениј Пригожин кон Москва пред два месеци, шефот на ЦИА Вилијам Барнс предвиде дека рускиот претседател Владимир Путин ќе се одмазди.
„Она што го гледаме е многу комплициран танц. Путин е ултимативен апостол на одмаздата“,
рече Барнс на безбедносниот форум во Аспен во јули.
Со оглед на истакнатата улога на „Вагнер“ во руските воени операции во Украина, која веќе беше значително намалена по неговиот марш кон Москва, што ги засрами Путин и Кремљ, за момент се чинеше дека Пригожин се обидува да врати дел од влијанието што го стекна од операцијата во Африка по наредба на Кремљ, пишува „Гардијан“ во својата анализа.
Пригожин даде изјава за поддршка на државниот удар во Нигер, што некои аналитичари го видоа како потсетник за тоа како „Вагнер“ некогаш им служел на целите на Кремљ. Оваа недела тој објави видео од некаде во Африка, сугерирајќи дека можеби нашол нова улога и дека неговите постапки се простени.
Во тоа видео, Пригожин инсистираше на регрутирање борци за операции во Африка, а истовремено ги повика инвеститорите од Русија да вложат пари во Централноафриканската Република преку Руската куќа, културен центар во главниот град на таа африканска земја.
„Вагнер“ обезглавен
Пригожин летал над регионот Твер во близина на Москва со други високи раководители на „Вагнер“ кога неговиот приватен авион се урна – според некои извештаи бил соборен од руската противвоздушна одбрана.
Пригожин не бил единствениот кој загинал во инцидентот. Со него на летот бил и Дмитриј Уткин, еден од неговите најблиски сојузници, уште една клучна личност во „Вагнер“. Поранешниот офицер и платеник на ГРУ, кој бил активен во Сирија чувајќи ги нафтените полиња, бил вклучен во организирањето на конвојот „Вагнер“ кој се обидел да се пробие до Москва.
Извештаите од руските социјални медиуми поврзани со „Вагнер“ сугерираат дека во авионот биле и други членови на раководството на „Вагнер“. Она што е јасно е дека „Вагнер“, како што некогаш беше организиран, повеќе го нема.
Според најновите извештаи, стотици борци на „Вагнер“, кои беа протерани во базите во Белорусија, почнааа да ја напуштаат таа земја, некои незадоволни од пониските плати, други се преселија да работат во Западна Африка. Војниците таму се намалија за повеќе од 5 000, односно за околу една четвртина.
Во самата Русија, операциите на „Вагнер“ беа на некој вид пауза во последните два месеци, бидејќи Пригожин и неговите сојузници изгледаа дека бараат нова улога во сенката на незадоволството на Путин, пишува „Гардијан“.
Откако ги распореди своите борци како топовско месо во битката за Бахмут, а потоа ја напушти Русија, можеби најголемото прашање е дали „Вагнер“ може да продолжи да дејствува во каква било одржлива форма во африканските држави каде што беше активен досега.
Може ли некој да го замени Пригожин
Иако се споменуваа имињата на можните замени за Пригожин кои би наишле на одобрение од Кремљ, не е сигурно дали некое од нив ќе може да го замени.
Голем дел од африканската империја на „Вагнер“, комбинирајќи операции за дезинформации, матни комерцијални интереси и платеничка работа, се потпираше на бескрупулозните врски што Пригожин и неговите блиски соработници ги направија во текот на годините. Имаше сугестии, на пример, дека „Вагнер“ ѝ помогна на воената хунта во Мали, придонесувајќи за одлуката на Франција да ја прекине својата речиси децениска воена операција во земјата.
И додека Кремљ во последно време подиректно им се додворува на воените лидери на земјите во самиот Сахел, Пригожин ревносно развиваше лични односи со воени лидери, водачи на воени удари и корумпирани политичари и бизнисмени.
Како што предложи поранешниот вицемаршал на британските воздухопловни сили Шон Бел, сега воен аналитичар, за „Скај њуз“ по маршот на „Вагнер“ во Москва во јуни, „Вагнер“ не е ништо без Пригожин:
„Ако ‘Вагнер’ групата е Евгениј Пригожин, тогаш тешко е да се види како ќе преживее. Тоа е крајот на ‘Вагнер’ како што го знаеме“.