Шпанците помлади од 60 години што ја примиле првата доза на вакцината на „Астра Зенека“ ќе им биде дозволено да добијат втора доза или од тој производител или од „Фајзер“, соопшти шпанската министерка за здравство Каролина Даријас.
Таа додаде дека ова е исклучок поради вонредни околности.
Шпанија во март ја ограничи употребата на вакцината на „Астра Зенека“ против ковид на луѓе постари од 60 години, поради загриженост за можна појава на згрутчување на крвта кај помлади луѓе по вакцинирањето. Со тоа, околу 1,5 милион Шпанци што ја примија првата доза на „Астра Зенека“ беа во неизвесност.
Студијата „Комбивакс“, спроведена од шпанскиот институт за здравство „Карлос III“, исто така, утврдила дека вакцинацијата со „Фајзер“ кај луѓе што ја примиле првата доза на „Астра Зенека“ е безбедна и ефикасна.