Шпанскиот регион Галиција забрани пушење на јавни места поради загриженоста дека го зголемува ризикот од пренесување на ковид-19.
Забраната се однесува за пушење на улица и на јавни места, како и во ресторани и барови, каде нема физичко растојание.
Шпанскиот северозападен регион Галиција е првиот што воведе ваква мерка, по што следуваа и Канарските острови и е резултат на зголемувањето на бројот на дневни лучаи со ковид, кои овој месец достигнаа до 1 500. Вчера бројката на дневно регистрирани случаи со ковид е 1 690 или вкупно 330 000 од почетокот на пандемијата. Во јуни, бројката на дневни случаи изнесуваше 150.
Овој потег е поддржан од истражувањето на Министерството за здравство, објавено минатиот месец, во кое се наведува врската помеѓу пушењето и ширењето на коронавирусот.
Ризикот е поради тоа што при издишувањето на чад, се испуштаат и капки и со тоа и потенцијално ковид-19.
Исто така, се вели дека пушачите се изложени на ризик од заразата и со тоа што ја допираат цигарата пред да ја внесат во уста, како и при вадење и ставање на маските пред и после пушење.
Истражувањето исто така укажува и на пошироките негативни здравствени ефекти од пушењето врз респираторните органи.
„Тековните докази покажуваат дека пушењето е поврзано со зголемен ризик од развој на тешка форма на симптоми“,
се вели во извештајот.