Шкотската национална партија (СНП) победи на изборите во Шкотска, а лидерката на партијата, Никола Старџен победата ја нарече историска и порача дека не се откажува од спроведување нов референдум за независност од Обединетото Кралство.
Ова е четврта последователна победа на СНП со која партијата освои 64 места во 129-члениот парламент.
Во победничкото обраќање Старџен рече дека нејзин приоритет ќе биде да ја извлече земјата од пандемијата, но и дека сепак има намера да спроведе референдум откако ќе заврши кризата, пренесува „Би-би-си“.
На премиерот на Велика Британија, Борис Џонсон му порача дека нема демократско оправдување ако се обиде да го блокира спроведувањето на референдумот.
Џонсон, пак, досега се противеше на оваа идеја со порака дека нема да признае вакво гласање на референдум со оглед дека жителите на Шкотска во 2014 поддржале останување во Обединетото Кралство.
Како втора политичка сила на овие избори завршија конзервативците со 31 место, потоа лабуристите со 22, зелените со 8 и либералдемократите со 4.