Шкотската премиерка претходно најавуваше дека ако не ја добие битката пред Врховниот суд тогаш следните избори ќе ги претвори во своевиден референдум за независност. На претходниот референдум во 2014 година „за“ беа 45 отсто од гласачите, а 55 отсто беа „против“, меѓутоа актуелната владејачка партија е уверена дека „брегзит“ го сменил расположението на населението
Шкотска нема овластување да донесува закони за одржување нов референдум за независност без согласност на владата во Лондон.
Ваква одлука донесе Врховниот суд на Велика Британија за новиот обид на шкотските власти да се изборат за нов референдум откако еден беше одржан во 2014 година.
Прашањето кое полуавтономната шкотска влада сака да им го постави на Шкотите е „Дали Шкотска треба да биде независна држава?“.
Битката пред британскиот Врховен суд започна во октомври, а најгласен навивач за независност е шкотската премиерка Никола Старџен. Таа во сите досегашни настапи јасно стави до знаење дека не се откажува од референдум, на кој се противеа и претходните конзервативни британска влада предводени од Лиз Трас и од Борис Џонсон.
Старџен ја засили реториката за независност по ланската победа на изборите, а во последните јавни настапи порача ако по владата и Врховниот суд одбие да одобри референдум на следните избори во Обединетото Кралство кои треба да се одржат во 2024 година, нејзината Шкотска национална партија ќе излезе единствено со платформа дека Шкотска треба да биде независна со што изборите ќе ги претвори во своевиден референдум.
„Тоа не е моја желба. Ако патот по кој ова прашање треба да се разгледува и да се одлучува, а тоа е законски и уставен референдум, биде блокиран, тогаш изборот што ни преостанува е едноставен: или ќе излеземе пред луѓето на избори или ќе се откажеме од шкотската демократија. Сакам да бидам многу јасно дека никогаш, ама никогаш нема да се откажам од шкотската демократија“,
рече Старџен пред нејзината влада да ја започне постапката пред Врховниот суд.
Конзервативната британска влада одбива да го одобри изјаснувањето, со образложение дека прашањето било решено на референдумот во 2014 година кога шкотските гласачи ја отфрлија независноста.
На референдумот во 2014 година, чии резултати британската влада ги користи како аргумент за одбивањето нов референдум со образложение дека тогаш гласачите јасно отфрлиле независност, 55 отсто гласаа „против“ независност, а 45 отсто беа „за“.
Меѓутоа, Шкотската национална партија на Старџен, која ја има поддршката од Зелените, е уверена дека „брегзит“ го смени расположението на населението, а како еден од аргументите премиерката го наведува и тоа што на гласањето за излез од ЕУ мнозинството од жителите на Шкотска биле против.