Создадени се правни услови за отстранување на една од галиите од коритото на Вардар, информираше на прес-конференција скопскиот градоначалник Петре Шилегов и даде рок до сопственикот да ја отстрани во наредните 30 дена. Станува збор за галијата кај стара пошта, во близина на мостот кој беше изграден наместо планираното панорамско тркало.
„Градот Скопје во изминатиов период водеше правни постапки за создавање услови за отстранување на галијата без да има финансиска импликација за Градот. Сопственикот има рок од 30 дена да ја отстрани сам, во спротивно, по истекот на рокот, Градот на негов трошок ќе го направи тоа“,
изјави Шилегов.
Според објаснувањето на Шилегов, анексот со сопственикот на галијата бил потпишан во 2016 година, а во 2018 година добил известување дека може да врши дејност, но објектот никогаш не почнал со работа.
„Ова беше нотирано и од надлежна комисија и е констатирана фактичката состојба, врз основа на која ќе се изврши дислокација на галијата“,
изјави Шилегов.
Кога ќе се дислоцираат и останатите галии, Шилегов не прецизираше бидејќи вели целта е да се создадат правни услови и да нема финансиски импликации за градскиот буџет.
Дислокација на галиите беше едно од главните ветувања на Шилегов уште пред неговиот мандат. Сепак, неодамна изјави дека евентуалното „насилно“ раскинување на договорите и отстранување на галиите ќе чини од 6 до 7 милиони евра, па најави дека кога ќе се заплени имотот на ВМРО-ДПМНЕ и кога ќе се продаде, дел од парите ќе се искористат за таа намена.
*Поврзана вест
Шилегов ја бара сопственоста на спомениците од „Скопје 2014“ за да почне да ги дислоцира