Во случајот „Синџир“, кој беше отворен кон крајот на октомври лани, со истрагата беа опфатени 26 лица, сопственици и управители на 28 фирми, осомничени дека создале шема за даночно затајување, преку која со издавање фактури со ДДВ за наводно извршени набавки, кои не постоеле, го оштетиле државниот буџет за околу осум милиони евра
Во пресрет на почетокот на судскиот процес за случајот „Синџир“ закажан за денеска во Основниот кривичен суд во Скопје, Основното јавно обвинителство за гонење организиран криминал и корупција (ОЈО ГОКК) преку писмено соопштение информира дека шестмина од обвинетите лица и фирми нема да бидат дел од судската постапка бидејќи веќе ги признале делата и им се изречени осудителни пресуди по претходна спогодба.
Воедно, од Обвинителството велат дека со постигнатите спогодби, кои биле прифатени од судија на претходна постапка при Основниот кривичен суд Скопје, на шестемина обвинети им се изречени условни казни, а во буџетот на државата се вратени речиси еден милион евра.
Инаку, во случајот „Синџир“, кој беше отворен кон крајот на октомври лани, со истрагата беа опфатени 26 лица, сопственици и управители на 28 фирми, осомничени дека создале шема за даночно затајување, преку која со издавање на фактури со ДДВ за наводно извршени набавки, кои не постоеле, го оштетиле државниот буџет за околу осум милиони евра.
Во меѓувреме истрагата беше проширена за уште две лица, а за едно лице, кое во меѓувреме додека траеше постапката за оценка на обвинителниот акт почина, донесено е решение за запирање на истрагата.
„Соочени со прибраните докази во текот на истрагата и периодот за оценување на Обвинителниот акт, шестмина осомничени и шест кривично одговорни правни лица поднесоа иницијативи за спогодување со обвинителството. Судијата на претходна постапка при Основниот кривичен суд Скопје ги прифати Предлог спогодбите и врз основа на истите донесе осудителни пресуди“,
се наведува во соопштението на ОЈО ГОКК.
Сите шестмина, кои признале вина и се спогодиле со Обвинителството, беа обвинети за кривичните дела злосторничко здружување од член 394 став 2 во врска со став 1 од Кривичниот законик (КЗ) и даночно затајување според член 279 став 2 во врска со став 1 од КЗ. На двајца од овие осомничени на товар им се ставаше и кривичното дело перење пари и други приноси од казниво дело, според член 273 став 1 од КЗ.
Станува збор за лицата Д.И., Ѓ.Л., В.У., Е.М., Р.П. и Х.К. на кои со спогодбата им се изречени условни затворски казни од една година до две години, доколку во наредните од три до пет години не сторат друго кривично дело.
Единствено на В.У. му е изречена ефективна затворска казна од една година. На четворица од обвинетите (Д.И., Ѓ.Л., Е.М. и Х.К.) им се изречени парични казни од по 183 900 денари, односно околу 3 000 евра, додека останатите двајца (В.У. и Р.П.) се казнети со по околу 5 000 евра.
Во однос на шесте фирми со кои е постигната спогодба, на три од нив судот им изрекол парични казни од по 500 000 денари или околу 8 000 евра, една фирма е казнета со еден милион денари, додека една од преостанатите е казнета со идентична сума, а другата со 400 000 денари или 6 500 евра.
„Согласно одредбите од Кривичниот законик за кривични дела на правни лица како главна казна се изрекува парична казна, а за кривични дела за кои е пропишана казна затвор од најмалку три години, правното лице се казнува со парична казна до еден милион денари или ако делото е сторено од користољубие или е предизвикана штета од големи размери најмногу до петкратниот износ на предизвиканата штета или остварената корист“,
се наведува во соопштението на ОЈО ГОКК.
Оттаму велат дека при одмерувањето на видот и определување на висината на казните при спогодувањето предвид биле земени сите олеснителни и отежнителни околности. Особено била земена предвид околноста што шесте фирми што се гонеа пред склучувањето на спогодбите го платиле целиот данок во износ од 50 646 068 денари или 823 519 евра што го затаиле.
„Две правни лица обвинети и за перење пари, освен уплатениот данок, во текот на постапката уплатиле и средства во вредност од 3 760 068,00 денари или 61 139 евра, средства што ги пуштиле во оптек и на кои извршиле пренос со намера да се прикрие нивното движење. Заедно со пресудените казни во државниот буџет до сега се уплатени вкупно 59 658 568 денари или 970 058 евра“,
велат од Обвинителството.
Инаку, според диспозитивот на Обвинителниот акт, обвинетите сопственици и управители на фирмите кривичните дела ги сториле во периодот од 1 јануари 2019 година до 31 декември 2021 година.
Акцијата за сузбивање на групата, како што информираа лани во октомври од ОЈО ГОКК, следуваше по повеќемесечна предистражна постапка што Обвинителството ја спроведе со Управата за финансиска полиција и истражители од Истражниот центар на Основното јавно обвинителство за гонење организиран криминал и корупција.
„Според содржината на диспозитивот на Обвинителниот акт обвинетите во својство на сопственици и управители на правни субјекти во периодот од 01.01.2019 година до 31.12.2021 година во име и за сметка на кривично одговорните правни лица во нивна сопственост и управување, не пресметале и не платиле данок – давачка на која биле законски обврзани. На овој начин, со намера за себе да се стекнат со противправна имотна корист, осомничените предизвикале штета на Буџетот на Р.С. Македонија во вкупен износ од 490 808 618 денари или 7 980 627 евра. Парични средства што ги прибавиле со казниви дела во вкупен износ од 40 046 815 денари ги пуштиле во оптег, ги примиле и извршиле пренос на истите, по што ги подигнале во готово“,
се наведува во соопштението од ОЈО ГОКК.